पालिकेच्या निवडणुकीत वकील आणि सीए यांना आले सुगीचे दिवस

सोलापूर महापालिकेत नगरसेवक होण्यासाठी अनेक जण गुडघ्याला बाशिंग बांधून तयार आहेत. काही हौशे,गवशे आणि नवशे देखील मेंबर म्हणवून घेण्यासाठी उमेदवारी मिळण्यासाठी वशीला लावत आहेत. अधिकृत पक्षाकडून उमेदवारी न मिळाल्यास बंडखोरी करणे किंवा अपक्ष म्हणून उभे राहणे असे पर्याय त्यांच्यासमोर आहेत. अशावेळी अर्ज बाद होऊ नये यासाठी उमेदवारी अर्जातील कायदेशीर बाबी, शपथपत्रांची मांडणी, जातीचा दाखला, निवडणूक नियमांचे पालन याबाबत वकिलांचे मार्गदर्शन घेत आहेत.
तसेच खर्च मर्यादाचे नियोजन, त्याच्या नोंदी यासाठी देखील सीएची मदत घेतली जात आहे. निवडणूक अर्ज दाखल करताना तीन वर्षाची आयकर विवरण पत्र, मालमत्ता व देणी यांचे मूल्यांकन, प्रतिज्ञापत्र, खर्चाचा तपशील, उत्पन्नाचे स्त्रोत, मालमत्तेची माहिती, थकीत कर्जे आणि गुन्हेगारी प्रकरणाची माहिती देणे अनिवार्य असते. ही सर्व माहिती अपूर्ण किंवा चुकीचे ठरल्यास अर्ज बाद होऊ शकतो. ही वेळ आपल्यावर येऊ नये म्हणून फॉर्म भरणारे सर्व उमेदवार सध्या सीए आणि वकिलांचे उंबरठे झिजवत आहेत.