आ. सुभाष देशमुखांच्या नाकावर टिच्चून दिलीप मानेंना भाजप प्रवेश

काँग्रेसचे माजी आमदार दिलीप माने यांच्या भाजप प्रवेशाला आमदार सुभाष देशमुख यांच्या कार्यकर्त्यांनी विरोध केला होता. सुभाष देशमुख यांनी देखील कडवा विरोध केल्यामुळे त्यांचा पक्ष प्रवेश जवळपास दोन महिन्यापासून रखडला होता. सोमवारी सोलापूर महापालिकेत आमदार सुभाष देशमुख यांच्या उपस्थितीत पालकमंत्री जयकुमार गोरे यांनी पत्रकार परिषद घेतली होती. दिलीप माने यांच्या पक्षप्रवेशाबाबत पालकमंत्र्यांना विचारले असता त्यांनी दिलीप मानेंचा पक्षप्रवेश सुभाष देशमुख ठरवतील असे उत्तर देखील दिले होते. मात्र सुभाष देशमुख यांचा विरोध डावलून… तसेच कार्यकर्त्यांनी केलेले आंदोलन कानाडोळा करत आज माजी आमदार दिलीप माने यांना भाजपने प्रदेशाध्यक्ष चंद्रकांत बावनकुळे यांच्या उपस्थितीत मुंबईमध्ये प्रवेश दिला. या पक्षप्रवेशाबाबत सुभाष देशमुख यांनी मात्र भाजपला खडे बोल सुनावले आहेत. महापालिका विधानसभा लोकसभा या निवडणुकीत कोणतेही तिकीट न घेण्याच्या अटीवर दिलीप माने यांना भाजपने प्रवेश दिला आहे आमची ताकद वाढणार आहे अशी विविध उत्तरे त्यांनी दिली. एकूणच सुभाष देशमुख यांच्या जखमेवर मीठ चोळण्यासाठीच त्यांच्या नाकावर टिचून दिलीप माने यांना भाजपने प्रवेश दिला हेच दिसते. आता दक्षिण सोलापूर मतदार संघात विधानसभा निवडणुकीसाठी तसेच सध्या जाहीर झालेल्या महापालिका निवडणुकीसाठी आणि आगामी होणाऱ्या झेडपीच्या निवडणुकीसाठी सुभाष देशमुख विरुद्ध दिलीप माने गट यांच्यात भाजपमधील राजकीय गटबाजी उफाळून येईल हे नक्की.