पंढरपूर – सोलापूर जिल्ह्यातील पंढरपूर नगरपालिका निवडणुकीसाठी नगराध्यक्ष पदाकरिता महाविकास आघाडीकडून दिवंगत आमदार भारत नाना भालके यांच्या स्नुषा डॉक्टर प्रणिती भगीरथ भालके यांना उमेदवारी देण्यात आली आहे. याबाबतची माहिती काँग्रेसच्या सोलापूर लोकसभा मतदारसंघाच्या खासदार प्रणिती शिंदे यांनी दिली असून, आज डॉक्टर प्रणिती भालके यांनी आपला उमेदवारी अर्ज दाखल केला आहे.
प्रणिती शिंदे म्हणाल्या, सोलापूर जिल्ह्यातील 11 नगरपालिका व एक नगरपंचायत निवडणुकीमध्ये काँग्रेस काही ठिकाणी आघाडीत तर काही ठिकाणी स्वबळावर लढणार असून उद्या अर्ज भरायचा शेवटचा दिवस असल्याने उद्या हे चित्र स्पष्ट होईल, अशी माहिती शिंदे यांनी दिली आहे. पंढरपूरमध्ये भाजपला रोखण्यासाठी सर्वच पक्ष एकत्रित आले असून महाविकास आघाडी आणि महायुतीतील नेत्यांनी एकत्र येत पंढरपूर तीर्थक्षेत्र विकास आघाडी स्थापन केली आहे. याच्या माध्यमातून भाजपला पंढरपूर नगरपालिकेच्या सत्तेवरून खेचण्यासाठी डॉक्टर प्रणिती भालके यांना उमेदवारी जाहीर केली आहे.
पुढे बोलताना प्रणिती शिंदे म्हणाल्या, डॉक्टर प्रणिती भालके या भाजपासाठी खूप मोठे आव्हान ठरणार असून त्यामुळेच अजूनही भाजपने आपल्या उमेदवाराचे नाव अद्याप घोषित केलेले नाही. भाजपाला रोखण्यासाठी दोन्ही राष्ट्रवादी काँग्रेस, राष्ट्रीय काँग्रेस, एकनाथ शिंदे यांची शिवसेना, मनसे यासह विविध संघटना डॉक्टर भालके यांच्या पाठीशी उभे आहेत.
स्थानिक स्वराज्य संस्थांच्या निवडणुकीच्या पार्श्वभूमीवर सर्वच राजकीय पक्षांच्या हालचालींना वेग आला असून, गाठीभेटी आणि दौरे सुरू झाले आहेत. राज्यातील प्रमुख राजकीय पक्ष, महायुती आणि महाविकास आघाडी, यांनी काही ठिकाणी एकत्र लढण्याची तर काही ठिकाणी स्वतंत्रपणे निवडणूक लढवण्याची भूमिका घेतली आहे. या मिश्र धोरणामुळे निवडणुकीचे चित्र प्रत्येक स्थानिक पातळीवर बदलताना दिसत आहे.
या सर्व घडामोडींमध्ये, पंढरपूर नगरपालिकेच्या निवडणुकीत मात्र महाविकास आघाडीतील सर्व पक्षांनी एकत्र येऊन भाजपच्या विरोधात आघाडी केली आहे, ज्यामुळे भाजपसमोर मोठे आव्हान उभे राहिले आहे. उमेदवारी अर्ज भरण्यास सुरुवात झाली असून, उद्या महायुतीकडून नगराध्यक्षपदासाठी कोण उमेदवारी अर्ज दाखल करणार हे पाहणे आता महत्त्वाचे ठरणार आहे.
