ग्राहक हक्क दिनानिमित्त आयोजित कार्यक्रमात प्रतिपादन
सोलापूर : आपली फसवणूक टाळली जाण्यासाठी ग्राहकांनी आपल्या हक्काबाबत जागरूक राहावे. नवीन पिढीने आपल्या हक्कांबाबत स्वतः जागरूक राहावे आणि इतरांनाही जागरूक करावे, असे प्रतिपादन जिल्हा ग्राहक संरक्षण परिषदेच्या सदस्य सचिव तथा जिल्हा पुरवठा अधिकारी वर्षा लांडगे यांनी आज येथे केले. ग्राहक हक्क दिन कार्यक्रमाच्या अध्यक्षस्थानावरून त्या बोलत होत्या.
शिवछत्रपती रंगभवन येथे आयोजित या कार्यक्रमास सहाय्यक आयुक्त अन्न व औषध प्रदीप राऊत, सेवानिवृत्त मुख्याध्यापक प्रेमचंद्र मेने, मोटार वाहन निरीक्षक किरण खंदारे, ग्राहक मंच सदस्या शोभना सागर, ॲड. आनंद सागर, दीपक हरकल, सहाय्यक निरीक्षक अमोल घुले व अक्षय जाधव, भैरवनाथ कानडे आदि मान्यवर व्यासपीठावर उपस्थित होते.
दरवर्षी 24 डिसेंबर हा दिवस भारतात विशिष्ट संकल्पनेसह राष्ट्रीय ग्राहक दिन म्हणून केला म्हणून जातो. यावर्षी यावर्षीची संकल्पना Effective disposal of cases in consumer commissions (ग्राहक आयोगातील प्रकरणे प्रभावीपणे निकाली काढणे) ही आहे. या संकल्पनेवर ग्राहकांची जनजागृती करण्यासाठी कार्यक्रम आयोजित करण्याच्या केंद्र शासनाच्या सूचना आहेत. त्यानुसार जिल्हा पुरवठा कार्यालय व अन्नधान्य वितरण कार्यालय यांच्या संयुक्त विद्यमाने हा कार्यक्रम घेण्यात आला.अॅड. आनंद सागर यांनी Effective disposal of cases in consumer commissions (ग्राहक आयोगातील प्रकरणे प्रभावीपणे निकाली काढणे) या विषयावर सविस्तर मार्गदर्शन केले. ग्राहक संघटनेच्या शोभना सागर, दीपक इरकल, पंढरपूर आणि भैरवनाथ कानडे यांनी ग्राहक हक्काबाबत मार्गदर्शन केले.
पाणी पुरवठा विभाग, पंचायत समिती, उ. सोलापूरचे सेवानिवृत्त उपअभियंता तथा शाहीर रमेश खाडे व त्यांच्या सहकाऱ्यांनी ग्राहक हक्कसंदर्भात जनजागृतीपर लोकगीत सादर केले. सहा. जिल्हा पुरवठा अधिकारी विवेक साळुंके यांनी आभार मानले.
दरम्यान, रंगभवन सभागृहासमोरील पटांगणात विविध शासकीय कार्यालयांनी ग्राहकांची जनजागृती करण्यासाठी उभारण्यात आलेल्या स्टॉलचे उद्घाटन मान्यवरांच्या हस्ते झाले.
तसेच, ग्राहक हक्क दिनानिमित्त चार पुतळा ते रंगभवन अशी विद्यार्थ्यांची रॅली काढण्यात आली. सदर दोन्ही कार्यक्रम यशस्वी होण्याकरिता जिल्हा पुरवठा कार्यालयातील सर्व कर्मचारी व महसूल सहा. यल्लप्पा वरगंटी, तसेच अन्नधान्य वितरण कार्यालयातील सर्व कर्मचारी, निरीक्षक, ग्राहक संघटनेतील पदाधिकारी यांचे सहकार्य लाभले.
