सोलापूर,दि.30- पुण्यश्लोक अहिल्यादेवी होळकर सोलापूर विद्यापीठातील संशोधन (पीएच.डी) विभागाच्यावतीने सर्व विद्याशाखेच्या सर्व विषयांच्या संशोधन मार्गदर्शकांसाठी बुधवार, 31 मार्च 2021 रोजी एकदिवसीय ऑनलाइन कार्यशाळेचे आयोजन करण्यात आल्याची माहिती कुलगुरू डॉ. मृणालिनी फडणवीस यांनी दिली.
संशोधन मार्गदर्शकांचे उदबोधन व्हावे व गुणवत्तापूर्ण संशोधनाला चालना मिळावी, यासाठी या कार्यशाळेचे आयोजन करण्यात आल्याचे कुलगुरू डॉ. मृणालिनी फडणवीस यांनी सांगितले. विद्यापीठाचे प्र-कुलगुरू डॉ. देबेन्द्रनाथ मिश्रा व मानवविज्ञान विद्याशाखेचे अधिष्ठाता डॉ. विकास कदम यांच्या पुढाकाराने ही कार्यशाळा होत आहे.
ही एकदिवसीय कार्यशाळा एकूण सहा सत्रात आयोजित करण्यात आली असून पहिल्या सत्रात सकाळी 11 ते 12 या वेळेत कुलगुरू डॉ. मृणालिनी फडणवीस ह्या ‘संशोधनाचे आकलन’ या विषयावर मार्गदर्शन करतील. दुसऱ्या सत्रात 12 ते 1 यावेळेत राष्ट्रसंत तुकडोजी महाराज नागपूर विद्यापीठ येथील डॉ. रेखा शर्मा ह्या ‘माहिती तंत्रज्ञानाचा संशोधनात उपयोग’ या विषयावर, तिसऱ्या सत्रात 1 ते 2 यावेळेत डॉ.आशिष लिंगे हे ‘संशोधन पद्धतीचा उपयोग व त्यातील निष्पन्नता’ या विषयावर मार्गदर्शन करणार आहेत.
चौथ्या सत्रात 3 ते 4 यावेळेत विश्वेश्वरय्या राष्ट्रीय तंत्रज्ञान संस्था,अंबाझरी येथील प्रा.डॉ.दिलीप पेशवे हे ‘संशोधन आणि नवोपक्रम’ या विषयावर मार्गदर्शन करतील. पाचव्या सत्रात 4 ते 5 यावेळेत राष्ट्रसंत तुकडोजी महाराज नागपूर विद्यापीठ येथील डॉ.श्रीनिवास खांदेवाले हे ‘संशोधनातील सर्वसामान्य प्रश्न आणि संशोधनाची गुणवत्ता वाढविण्यासाठी संशोधन मार्गदर्शकाची भूमिका’ या विषयावर मार्गदर्शन करतील. सहाव्या सत्रात 5 ते 6 यावेळेत विद्यापीठाचे प्र-कुलगुरू डॉ.देबेन्द्रनाथ मिश्रा हे ‘पीएच.डी.ची नियमावली आणि गुवत्तेसाठी आवश्यक बाबी’ या विषयावर मार्गदर्शन करणार आहेत.
https://youtu.be/p95PcwLvqg0 या लिंकवरून विद्यार्थी व संशोधक अभ्यासकांना कार्यक्रमाचा लाभ घेता येईल. या कार्यशाळेसाठी डॉ.एस.डी.राऊत व प्रा.सी.जी.गार्डी हे तंत्रसहाय्य करीत असून कार्यशाळा यशस्वीतेसाठी संशोधन विभागाचे सहायक कुलसचिव डॉ. शिवाजी शिंदे, कक्ष अधिकारी देवकन्या पांढरे व संशोधन विभागातील कर्मचारी हे नियोजन करत आहेत.
