येस न्युज मराठी नेटवर्क : सोलापूर शहर व जिल्ह्यात शुक्रवारी रात्री बारापर्यंत आलेल्या अहवालानुसार नवीन ६७७ व्यक्तींना कोरोनाची लागण झाल्याचे स्पष्ट झाले आहे. सोलापूर शहरातील २७७ तर सोलापूर जिल्ह्यात ४०० जणांना कोरोनाची नव्याने बाधा झाली आहे. सोलापूर शहराचा विचार केला तर १७९ ठिकाणी नवे रुग्ण आढळून आले आहेत .यामध्ये चिंतेची बाब म्हणजे विविध अपार्टमेंटमध्ये कारोनाचे रुग्ण आढळत आहेत .रेल्वे लाईन्स येथील भावना अपार्टमेंट, लोटस अपार्टमेंट, दत्त चौकातील राधेकृष्ण अपार्टमेंट, बाळीवेस येथील मल्लिकार्जुन अपार्टमेंट आणि लक्ष्मी अपार्टमेंट, सैफुल येथील सूर्या कॉम्प्लेक्स, उत्तर सदर बझार येथील सुधीर अपार्टमेंट, विजापूर रस्त्यावरील आय एम पी ग्रीन्स , मजरेवाडी येथील युनायटेड ग्रींस, भैय्या चौकातील इंद्रधनू अपार्टमेंट आणि उत्तर सदर बाजार येथील सुधीर अपार्टमेंट अशा सर्व ठिकाणी कोरोनाचे रुग्ण आढळून आले आहेत. अपार्टमेंटमधील रहिवाशांनी आता अधिक काळजी घेणे आवश्यक आहे .
महापालिकेने देखील या अपार्टमेंटमधील रुग्णांचे तसेच त्यांच्या जवळच्या नातेवाईकांचे कौन्सिलिंग करणे आवश्यक आहे. सोलापूर जिल्ह्याचा विचार केला तर नवीन चारशे व्यक्तींना कोरोणाची बाधा झाली असून त्यामध्ये बार्शी अजूनही अग्रभागी आहे. बार्शी शहरात 100 जणांना तर बार्शी तालुक्यातील ग्रामीण भागात 37 जणांना शुक्रवारी कारोणाची लागण झाल्याचे स्पष्ट झाले. त्याचप्रमाणे करमाळ्याच्या ग्रामीण भागात २६, माढा ५८, माळशिरस ५८, मंगळवेढा १३, पंढरपूर २६, आणि सांगोला १५ असे ग्रामीण भागात २५१ नवीन कोरोना बाधित झाले आहेत. जिल्ह्यातील पाच जणांचा कोरोनामुळे मृत्यू ओढवला आहे. बार्शी येथील अध्यापक कॉलनीतील 79 वर्षाच्या व्यक्तीचा सुश्रुत हॉस्पिटलमध्ये मृत्यू झाला. बार्शी तालुक्यातील भालगाव येथील 76 वर्षाच्या व्यक्तीचा जगदाळे मामा हॉस्पिटल मध्ये मृत्यू झाला. मंगळवेढ्यातील दामाजी नगर येथील ८० वर्षाच्या व्यक्तीचा तसेच मोहोळ येथील आदर्श चौकातील ७३ वर्षाच्या महिलेचा सोलापुरातील यशोधरा रुग्णालयात मृत्यू झाला. माढा तालुक्यातील कुर्डूवाडी येथील ६१ वर्षाच्या व्यक्तीचा गंगामाई हॉस्पिटलमध्ये मृत्यू झाला आहे .
शहर आणि जिल्ह्यातील नव्याने कोरोना होणाऱ्या बाधितांची संख्या सातत्याने वाढत असल्याने महापालिका व जिल्हा प्रशासन अत्यंत चिंतेत असल्याचे आहे. सोलापूर शहर व जिल्ह्यात निर्बंध अधिक कडक करण्याबाबत एक-दोन दिवसात नवीन आदेश निघण्याची शक्यता वर्तविली जात आहे.
