भाजपच्या प्रशिक्षण शिबिराला 19 नगरसेवकांची दांडी, 18 जण दुसऱ्या दिवशी गायब

सोलापूर सह राज्यातील चार महापालिकेतील भाजप नगरसेवकांचे सहा आणि सात सप्टेंबर रोजी ठाण्यातील रामभाऊ म्हाळगी प्रशिक्षण केंद्रात आयोजित केलेल्या शिबिराला पहिल्या दिवशी एकोणीस जण गैरहजर होते तर पहिला दिवस प्रशिक्षण घेऊन दुसऱ्या दुसऱ्या दिवशीच्या प्रशिक्षण शिबिराला 18 जणांनी दांडी मारली. हे प्रशिक्षण शिबिर भाजपच्या सर्व नगरसेवकांना सक्तीचे होते. गैरहजर असलेल्या नगरसेवकांना कारणे दाखवा नोटीस काढून त्याचा अहवाल भाजप प्रदेशाला पाठवण्यात येणार आहे. भाजप शहराध्यक्ष रोहिणी तडवळकर, तसेच महापालिकेतील भाजपचे पक्ष नेते नरेंद्र काळे यांनी ही माहिती दिली. मुख्यमंत्री देवेंद्र फडणवीस, भाजपचे प्रदेशाध्यक्ष रवींद्र चव्हाण, पालकमंत्री जयकुमार गोरे यांनी या प्रशिक्षण शिबिरात नगरसेवकांना शिस्तीचे आणि भाजपचे धडे दिले. नगरसेवकांनी नागरिकांमध्ये मिसळून कामे करावी, तरुणांबरोबर जास्तीत जास्त कार्यक्रम करा, नागरिकांच्या समस्या जाणून घ्या त्यांच्याशी चांगली बोला असे अनेक सल्ले या प्रशिक्षण शिबिरात देण्यात आले. सोलापूर शहर मध्य, दक्षिण सोलापूर तसेच उत्तर सोलापूर या तीनही मतदार संघातील अनेक नगरसेवकांनी याकडे पाठ फिरवली याची पक्षाने गंभीर दखल घेतली आहे.