सोलापूर- भारती विद्यापीठ-सोलापूर येथे आंतरराष्ट्रीय योग दिन उत्साहात साजरा करण्यात आला. यानिमित्ताने विद्यार्थी, शिक्षक व शिक्षकेत्तर कर्मचाऱ्यांसाठी विशेष योगाभ्यास सत्राचे आयोजन करण्यात आले.
या कार्यक्रमात प्रा.डॉ. एस. सी. मैंदर्गी यांनी योगाचे आरोग्यासाठी असलेले महत्त्व विशद करत विविध योगासने व प्राणायामाचे प्रात्यक्षिकांसह मार्गदर्शन केले.कार्यक्रमाच्या प्रारंभी राष्ट्रीय सेवा योजना (NSS) समन्वयक प्रा. सी. आर. सूर्यवंशी यांनी उपस्थितांचे स्वागत केले. यावेळी संचालक प्रा. डॉ. एस. बी. सावंत यांनी योगाचे दैनंदिन जीवनातील महत्त्व अधोरेखित केले. ते म्हणाले की, “प्रत्येक व्यक्तीने आपल्या आरोग्यासाठी दररोज किमान एक तास वेळ देऊन नियमित योगाभ्यास करणे आवश्यक आहे. योगामुळे शारीरिक तंदुरुस्ती, मानसिक स्थैर्य आणि कार्यक्षमता वाढते. त्यामुळे व्यक्ती आपल्या जबाबदाऱ्या अधिक प्रभावीपणे पार पाडू शकते.”
कार्यक्रमाचा समारोप प्रा. डॉ. आर. एन. मांजरे यांच्या आभार प्रदर्शनाने झाला. या योगाभ्यास सत्रात विद्यार्थी, शिक्षक तसेच शिक्षकेत्तर कर्मचारी मोठ्या संख्येने सहभागी झाले होते. सर्वांनी नियमित योगाभ्यास करण्याचा संकल्प करून आंतरराष्ट्रीय योग दिनाचा संदेश समाजापर्यंत पोहोचविण्याचा निर्धार व्यक्त केला.
