कुठेही अनुचित प्रकार न घडता सोलापूरसह राज्यभरात काल गणेश विसर्जन मिरवणुका मोठ्या उत्साही वातावरणात पार पडल्या. सोलापूरच्या मानाच्या आजोबा गणपतीचे आज सकाळी साडेसात वाजता सिद्धेश्वर तलावातील विष्णू घाट या ठिकाणी विसर्जन झाले. पोलीस,महापालिका तसेच धर्माधिकारी प्रतिष्ठानच्या सदस्यांनी कौतुकास्पद काम केले. सुप्रीम कोर्टाच्या आदेशाचे पालन करत रात्री बारा वाजता सर्वच मंडळाचे साऊंड बंद झाले. सोलापूरच्या या गणेशोत्सव मिरवणुकीतील दोन कौतुकास्पद आणि दोन चिंताजनक बाबी आज येस न्यूज मराठी च्या माध्यमातून दर्शकांसमोर मांडत आहोत. सर्वात महत्त्वाचे म्हणजे डॉल्बी आणि डीजेला फाटा देऊन सर्वच मंडळांनी पारंपारिक वाद्ये वाजवून गणरायाला निरोप दिला. बहुतांश मंडळांचा लेझीमवर भर होता. दुसरी चांगली बाब म्हणजे दरवर्षी शेकडो क्विंटल निर्माल्य पाण्यात टाकून गणेश भक्त जलप्रदूषण करत होते यंदा मात्र महापालिका आणि धर्माधिकारी प्रतिष्ठानच्या टीमने जोरदार काम करून शेकडो क्विंटल निर्माल्य संकलित केले. यातून खत निर्मिती केली जाणार आहे हे कौतुकास्पद.
चिंता करायला लावणारी एक बाब म्हणजे गुलाल उधळण्याचा अतिरेक. थेट मशीनच्या साह्याने गुलाल उधळणे आणि प्लास्टिकच्या कागदाचे लहान- लहान तुकडे हवेत उडविणाऱ्या मशीनचा मिरवणुकीत वापर केल्यामुळे हवेत खूप मोठ्या प्रमाणावर प्रदूषण झाले. आज सकाळी मिरवणूक मार्गावरील स्वच्छता करताना महापालिकेच्या टीमची चांगलीच दमछाक झाली. खड्डे पडलेल्या रस्त्यावर गुलालाचे आणि प्लास्टिक तुकड्यांचे थरच्या थर लागल्यामुळे डांबरी रस्ते लालेलाल झाले होते. शिवाय चौका चौकात भले मोठे उभारलेले डिजिटल सगळ्यांनाच अडथळा ठरत होते. सार्वजनिक उत्सव साजरा करताना त्याचा इतरांना त्रास होणार नाही याचे भान सर्वांनीच ठेवावे लागणार आहे.
