सोलापूरच्या सिद्धेश्वर तलावातील पाण्याचे प्रदूषण रोखणे… तसेच परिसरातील घाणीवर नियंत्रण आणणे याकडे महापालिका, जिल्हाधिकारी कार्यालय तसेच देवस्थान यांच्याकडून विशेष प्रयत्न होताना दिसत नाहीत. उलट ज्या गरजेच्या गोष्टी नाहीत त्या करून कोट्यावधी रुपयांची उधळपट्टी केली जात आहे. यापूर्वी सार्वजनिक बांधकाम विभागाच्या माध्यमातून शासन निधीतून सुमारे अडीच कोटी रुपये खर्चून पाण्याची प्रदूषण रोखण्यासाठी एरिएटर बसवण्यात आले. त्याचा फारसा उपयोग झाल्याचे दिसत नाही. शिवाय ते एरियेटर बऱ्याच वेळा बंद असतात. त्यामुळे तलावातील पाण्याची गुणवत्ता पूर्णपणे ढासळली असून दुर्गंधी सुटली आहे. सोलापूर महापालिकेने सिद्धेश्वर तलावा भोवतालचा वॉकिंग ट्रॅक विकसित करणे, वृक्षारोपण करणे तसेच सीसीटीव्ही लावणे यावर स्मार्ट सिटी योजनेतून 23 कोटी रुपये खर्च केले. याच योजनेतून लावलेले संगीतकारंजे देखील बंद आहेत.
परिसरात स्वच्छता राखणे,पार्किंग सुविधा विकसित करणे, पर्यटकांना वॉशरूम तसेच टॉयलेटची व्यवस्था करणे, सुरक्षा गार्ड नेमणे याकडे लक्ष देण्याऐवजी शासनाकडून कोट्यावधी रुपयांचा निधी नको त्या कामावर खर्च केला जात आहे. आता एक कोटी ५५ लाख रुपये खर्च करून सिद्धेश्वर मंदिरावर विद्युत रोषणाई करणे तसेच सीसीटीव्ही बसवणे या कामाचे टेंडर सार्वजनिक बांधकाम विभागाच्या माध्यमातून प्रसिद्ध करण्यात आले आहे. त्यामुळे अशी कामे करणे म्हणजे रोग हल्ल्याला आणि इंजेक्शन पखालीला असाच प्रकार आहे.
