४ लाखांचा माल जप्त; सोलापूर ग्रामीण च्या एल. सी. बी. ची कामगिरी
सोलापूर : ग्रामीणच्या एल.सी. बी. पथकाने घरफोडी व जनावरांची चोरी करणाऱ्या उत्तर सोलापूर तालुक्यातील कारंबा येथील गोविंद सरदार काळे , आप्पा बाळू पवार या दोघांना अटक करून चार लाखांचा मुद्देमाल हस्तगत केला आहे. घरफोडीचे जिल्ह्यातील चार गुन्हे उघडकीस आले आहेत. बाणेगाव येथील बंद असलेल्या कारखान्यातील चोरलेले म्युझिक सिस्टिम, इन्व्हर्टर बॅटरी, ऑफिसची खुर्ची, पन्हाळी पत्रे, मोटार, वायरचे बंडल व इतर साहित्य असा ३,८७,००० रुपयांचा माल हस्तगत करण्यात यश मिळाले आहे . तसेच कारंबा शिवारातील शेतातील बंद घराचे कुलूप तोडून त्यातील एक म्हैस व रेडकी चोरून दोन्ही जनावरे शिरनाळ , तालुका विजापुर येथे कर्नाटक राज्यात विकल्याचे या दोघांनी पोलिसांकडे कबूल केले आहे.
गोविंद काळे व आप्पा पवार यांच्या कबुलीजबाबानुसार बाणेगाव, कारंबा , कासेगाव आणि अक्कलकोट येथील चार गुन्हे केल्याचे उघड झाले आहे. या दोघांच्या अन्य साथीदारांचा तपास करण्यात येत आहे. सहाय्यक पोलीस निरीक्षक रविंद्र मांजरे व त्यांच्या पथकाने पार्क चौकात सापळा रचून या दोघांना ताब्यात घेतले आहे. दोघांना सोलापूर तालुका पोलिस ठाण्याच्या ताब्यात देण्यात आले असून सध्या ते पोलीस कोठडी मध्ये आहेत. त्यांच्याकडून आणखी जनावरे चोरी व घरफोडीचे गुन्हे होण्याची शक्यता आहे. सदर टोळी मधील एक व्यक्ती हा केंद्र सरकारचा कर्मचारी असून तो रेल्वेमध्ये कामावर असल्याचे सांगण्यात आले.
