सोलापूर शहरात करोडो रुपये खर्च करून विविध योजनेतून केलेले रस्ते महापालिकेच्या विविध विभागांमध्ये समन्वय नसल्यामुळे फोडले जातात हे नेहमीप्रमाणे दिसणारे दृश्य. होटगी रोडवरील महिला हॉस्पिटल ते विमानतळ आणि पुढे जेऊर पर्यंत जाणारा 29 किलोमीटर लांबीचा रस्ता करण्यासाठी महाराष्ट्र इन्फ्रास्ट्रक्चर डेव्हलपमेंट कंपनीच्या माध्यमातून 165 कोटी रुपये खर्चून या रस्त्याचे सिमेंटीकरनाचे करण्याचे काम सुरू आहे. गेल्या सहा महिन्यात शहराधित हे काम गतीने सुरू असताना महापालिकेचे अधिकारी आणि पदाधिकारी याबाबत अनभिज्ञ होते की काय असा प्रश्न निर्माण झाला आहे. होटगी रोड ते विमानतळ पर्यंत सुमारे सहा किलोमीटर शहरात येथील रस्ता करण्यासाठी सुमारे 30 कोटी खर्च होत आहेत. या रस्त्याची सुमारे 70 टक्के काम पूर्ण झाले आहे. आणि आता महापालिकेचे अधिकारी आणि पदाधिकारी जागी झाले आहेत.
विविध अशा 18 ठिकाणी ड्रेनेज लाईन टाकण्यासाठी तसेच 12 ठिकाणी जलवाहिनी टाकण्यासाठी हा एका महिन्यापूर्वीच केलेला रस्ता फोडला जाणार आहे. दोन दिवसापूर्वी महापालिकेत अधिकारी पदाधिकाऱ्यांची बैठक होऊन या रस्त्याचे काम थांबवण्याचे आदेश महापालिका आयुक्त सचिन ओंबासे यांनी दिले होते. या परिसरात रस्ता उंच त्यानंतर दोन्ही बाजूला असलेल्या स्ट्रॉम वॉटर ड्रेन वर झाल्या असून अनेकांची घरे दुकाने ही खाली गेली आहेत. त्यामुळे नागरिकांना ये -जा करणे देखील मुश्किल झाले आहे. शहरवासीयास आणि माध्यमामधून याची ओरड सुरू झाल्यानंतर याची तीव्रता जाणू लागली आहे आज महापालिकेचे अधिकारी आणि पदाधिकारी या रस्त्याची पाहणी करणार आहेत. त्यामुळे काम 70 टक्के पूर्ण होईपर्यंत महापालिकेतील अधिकारी झोपा काढत होते का असा संतप्त सवाल नागरिकांमधून व्यक्त होत आहे.
