‘बोलवाडी’मध्ये ५१ कर्णबधीर मुलांना मिळाली श्रवणयंत्रंं
शेटफळ : येथील ‘व्हॉईस ऑफ व्हॉईसलेस अभियान’ संचलित ‘बोलवाडी’ प्रकल्पात ५१ कर्णबधीर मुलांना श्रवणयंत्रं देण्यात आली. ही मुलं आता इतर सर्वसामान्य मुलांप्रमाणेच बोलू शकणार असून यामुळे बोलवाडीतून सुरू झालेली मुकेपणा निमूर्लनाची चळवळ अधिक गतिमान झाली आहे.
कर्णबधीर मुलं ही कानावर शब्द न पडल्यामुळे मुकी होतात. पण जर या मुलांना लहानपणीच श्रवणयंत्रांच्या मदतीने स्पीच थेरपी दिली तर ती बोलू शकतात. शेटफळ (जि. सोलापूर) येथील जयप्रदा व योगेशकुमार भांगे या दांपत्याने स्वतःच्या प्रसून या मुलाच्याबाबतीत हे सिद्ध करून दाखवलं आहे. स्वतःच्या वेदनेवर त्यांनी शोधलेल्या या उपायातून व्हॉईस ऑफ व्हॉईसलेस अभियान या संस्थेचा जन्म झाला.
या संस्थेच्या बोलवाडी या प्रकल्पात जिल्ह्यातील कर्णबधीर बालकांना स्पीच थेरपी दिली जाते. प्रिसिजन फाऊंडेशनने २०१५ सालच्या ‘प्रिसिजन गप्पा’ या सांस्कृतिक कार्यक्रमात ‘स्व. सुभाष रावजी शहा स्मृति पुरस्कार’ देऊन भांगे दांपत्याचा गौरव केला होता. त्यानंतर प्रिसिजनच्या सीएसआर निधीतून बोलवाडी प्रकल्पाची २०१७ साली उभारणी झाली. बोलवाडी प्रकल्प हा आता मुकेपणा निर्मूलनाच्या चळवळीचं केंद्र बनला आहे.
प्रिसिजन समूहाच्याच सहकार्याने २०१९ साली अंगणवाडी सेविकांच्या मदतीने सोलापूर जिल्ह्यातील २ लाख ८९ हजार बालकांची ‘ताटवाटी चाचणी’ करण्यात आली. त्यातून शून्य ते सहा वयोगटातील १४९ बालके कर्णबधीर असल्याचे स्पष्ट झाले. व्हॉईस ऑफ व्हॉईसलेसच्या ‘ताटवाटी चाचणी’ या अत्यंत सोप्या पण परिणामकारक निदानपद्धतीची दखल शासनानेही घेतली.
पहिल्या टप्प्यात या १४९ पैकी ५१ कर्णबधीर बालकांना बेंगळुरू (कर्नाटक) येथील गिफ्टएबल्ड संस्थेकडून श्रवणयंत्रं देण्यात आली. प्रिसिजन फाऊंडेशनच्या अध्यक्षा डॉ. सुहासिनी शहा, गिफ्टएबल्डचे संचालक श्री. प्रतीक कौल, जिल्हा परिषदेचे उपमुख्य कार्यकारी अधिकारी श्री. जावीर शेख, मंगळवेढ्याच्या नगराध्यक्षा सौ. अरूणा माळी यांच्या हस्ते या श्रवणयंत्रांचं वितरण झालं.
यावेळी प्रार्थना कौल, शुभम गुजर, जयप्रदा व योगेशकुमार भांगे, भरत नाईक, नामदेव मल्लाव, वासंती व राजू गावंधरे, गायत्री व संतोष कचरे, लक्ष्मी व अभिजीत बारसकर, नवनाथ धुरूपे, सारिका व दत्तात्रय अंकुशे, दीपक कुंभार, विश्वनाथ नकाते, नवनाथ शिंदे, कैलास काटकर, तानाजी इंगळे, संगीता चौधरी, कल्पना घाडगे, हर्षदा व मंदार डोईफोडे हे उपस्थित होते.
