मुख्यमंत्री देवेंद्र फडणवीस यांच्यासह वस्त्रोद्योग मंत्री संजय सावकारे यांची घेतली भेट : पालकमंत्री जयकुमार गोरे यांची उपस्थिती
सोलापूर : प्रतिनिधीसोलापुरातील वस्त्रोद्योगाला चालना मिळावी याकरिता सोलापुरात उत्पादित होणारे सादर टॉवेल यांची खरेदी महाराष्ट्र शासनाकडून करण्यात यावी तसेच महाराष्ट्र शासनाकडून काढण्यात येणाऱ्या निविदांमध्ये ही चादर आणि टॉवेलच्या खरेदीचा समावेश करावा अशी आग्रही मागणी आमदार देवेंद्र कोठे यांनी मुख्यमंत्री देवेंद्र फडणवीस यांच्याकडे केली. मंगळवारी राज्याचे वस्त्रोद्योग मंत्री संजय सावकारे यांच्याकडेही मागणी केल्यानंतर मंत्री संजय सावकारे यांनी सकारात्मक प्रतिसाद दिला आहे.
दरम्यान, मंगळवारी आमदार देवेंद्र कोठे यांनी सोलापुरातील चादर आणि टॉवेल उत्पादक, उद्योजक यांच्या शिष्टमंडळासह मुख्यमंत्री देवेंद्र फडणवीस तसेच वस्त्रोद्योग मंत्री संजय सावकारे यांची मुंबई येथे भेट घेतली. २००५ साली सोलापुरातील चादर आणि टॉवेल ला जीआय मानांकन प्राप्त झाले आहे. जीआय मानांकन प्राप्त असलेले सोलापूरचे चादर आणि टॉवेल राज्य शासनाने खरेदी करावेत तसेच राज्य शासनाच्यावतीने काढण्यात येणाऱ्या विविध निविदांमध्येही टॉवेल आणि चादरच्या खरेदीचा समावेश असावा अशी मागणी यावेळी करण्यात आली.
याबाबत राज्य शासनाकडून सकारात्मक निर्णय घेण्यात येईल, असे सांगत वस्त्रोद्योग मंत्री संजय सावकारे यांनी सोलापूरच्या शिष्ट मंडळाला आश्वासित केले. तसेच सोलापूरच्या शिष्टमंडळाने दिलेल्या निवेदनावर शेरा मारून तो संबंधित सचिवांनाही पाठवला. या शिष्टमंडळात पेंटप्पा गड्डम, राजू राठी, मल्लिकार्जुन कमटम, भाजप उद्योग आघाडीचे प्रमुख अंबादास बिंगी यांचा समावेश होता. वस्त्रोद्योग मंत्री संजय सावकारे यांच्या सकारात्मक प्रतिसादामुळे सोलापूरच्या चादर आणि टॉवेल उद्योगाला ‘अच्छे दिन’ येण्याची आशा निर्माण झाली आहे.
कोटलाखो सोलापूरकरांना समाधानसोलापुरातील लाखो नागरिक प्रत्यक्ष किंवा अप्रत्यक्षपणे चादर आणि टॉवेल उत्पादनाशी संबंधित आहेत. जीआय मानांकन मिळवलेले चादर आणि टॉवेल राज्य शासनाने खरेदी केल्यास तसेच राज्य शासनाच्या निविदांमध्येही याचा समावेश झाल्यास सोलापुरातील चादर आणि टॉवेल उद्योगाला मोठी संधी उपलब्ध होणार आहे. राज्य शासनाच्या या सकारात्मक भूमिकेचे लाखो सोलापूरकरांना समाधान आहे.
