सोलापूरकरांसाठी यंदाच्या आर्थिक वर्षातही कोरोनाविरुद्धच्या लढाईवर फोकस
सोलापूर दि. २६ : कोरोनाच्या दुसर्या लाटेमुळे सोलापूर शहरजिल्ह्यात व्हेंटिलेटर्स आणि ऑक्सिजन कॉन्संट्रेटर्सचा तुटवडा मोठ्या प्रमाणावर जाणवत असल्याचं चित्र आहे. या पार्श्वभूमीवर प्रिसिजन उद्योगसमूहाकडून आपल्या सीएसआर निधीतून शहरासाठी चार व्हेंटिलेटर्स तर ग्रामीण भागासाठी सात ऑक्सिजन कॉन्संट्रेटर्स देण्यात आले आहेत.
सोलापूरातील श्री मार्कंडेय सोलापूर सहकारी रूग्णालय आणि ‘स्पिन’ अर्थात एस. पी. इन्स्टिट्यूट ऑफ न्यूरोसायन्सेस यांना प्रत्येकी दोन व्हेंटिलेटर्स प्रिसिजनकडून देण्यात आले आहेत. मार्कंडेय रूग्णालयात महात्मा फुले जनआरोग्य योजनेतील गरीब रूग्णांवर या व्हेंटिलेटरद्वारे सवलतीच्या दरात उपचार केले जातील. तसेच ‘स्पिन’मध्येही आर्थिकदृष्ट्या दुर्बल रूग्णांना या व्हेंटिलेटरचा मोठा लाभ मिळेल. प्रिसिजन फाउंडेशनच्या अध्यक्षा डॉ. सुहासिनी शहा यांनी मार्कंडेय रूग्णालयाचे अध्यक्ष डॉ. माणिक गुर्रम आणि स्पिन हॉस्पिटलच्या डॉ. शोनाली वळसंगकर यांच्याकडे हे व्हेंटिलेटर्स सुपूर्द केले.
कोरोनाच्या दुसर्या लाटेत सोलापूरच्या ग्रामीण भागातही रूग्णांची संख्या लक्षणीयरित्या वाढली. मात्र त्या तुलनेत सोलापूर जिल्ह्याला होणारा ऑक्सिजनचा पुरवठा कमी आहे. त्यामुळे ग्रामीण भागातील अत्यवस्थ रूग्णांची सोय व्हावी या उद्देशाने एकूण सात ऑक्सिजन कॉन्संट्रेटर्स देण्यात आले. भंडारकवठे (ता. दक्षिण सोलापूर) व मोडनिंब (ता. माढा) यांच्यासाठी प्रत्येकी दोन तसेच पिंपळनेर व टेंभुर्णी (ता. माढा), माढा यांच्यासाठी प्रत्येकी एक ऑक्सिजन कॉन्संट्रेटर देण्यात आला.
ज्या समाजातून आपण उद्योग उभारला आहे त्या समाजाचं आपण काही देणं लागतो, ही सामाजिक बांधिलकीची भावना ‘प्रिसिजन’ने कायमच जोपासली आहे. याच दृष्टीने यंदाच्या २०२१-२२ या चालू आर्थिक वर्षातही प्रिसिजन समूहाने आपला सीएसआर निधी कोरोनाविरूद्धच्या लढाईवरच केंद्रित केला आहे
