आमदार सुभाष देशमुख यांच्या पाठपुराव्याला यश..
सोलापूर – दक्षिण सोलापूर तालुक्यातील मंद्रूप या गावासाठी अखेर वीज वितरण कंपनीने स्वतंत्र उपविभागीय कार्यालयास मंजुरी दिली आहे. या कार्यालयासाठी बारा पदांची निर्मिती होणार असून पुढील महिन्यात या कार्यालयाच्या निर्मितीस सुरुवात होणार आहे. आमदार सुभाष देशमुख यांच्या सातत्यपूर्ण पाठपुराव्यामुळे हा ऐतिहासिक निर्णय घेण्यात आल्याचे स्पष्ट झाले आहे.
सध्या मंद्रूप हे बारामती परिमंडळातील सोलापूर मंडळ अंतर्गत सोलापूर ग्रामीण उपविभागीय क्रमांक दोनशी जोडलेले आहे. या विद्यमान कार्यालयाचे विभाजन करून मंद्रूप येथे नवीन उपविभागीय कार्यालयाची स्थापना केली जाणार आहे. त्यामुळे परिसरातील वीज ग्राहकांच्या समस्या तत्काळ मार्गी लागण्यास मोठी मदत होणार आहे.
या नव्या कार्यालयाखाली मंद्रूप, भंडारकवठे, अंत्रोळी आणि वडकबाळ या गावांतील शाखांचा समावेश करण्यात येणार आहे. कार्यालयाची कार्यक्षमता वाढवण्यासाठी एकूण बारा पदांची निर्मिती करण्यात आली असून, यामुळे मनुष्यबळाची समस्या सुटणार आहे.
नव्या कार्यालयासाठी १ कोटी २६ लाख ७३ हजार ९२ रुपये एवढ्या खर्चास मंजुरी मिळाली आहे. त्याचबरोबर कार्यालयीन इमारतीच्या निर्मितीसाठी ७ लाख रुपये खर्चाला देखील मंजुरी देण्यात आली आहे. या निधीतून कार्यालयाचे प्रशासकीय कामकाज सुरू करण्यासाठी आवश्यक सुविधा उभारल्या जाणार आहेत.
नवीन उपविभागीय कार्यालय सुरू झाल्यानंतर नागरिकांना वीज बिल, नवीन जोडणी, तांत्रिक बिघाड, ट्रान्सफॉर्मर समस्या यांसारखी सर्व कामे मंद्रूपमध्येच सहजरीत्या करता येणार आहेत. आतापर्यंत ही सर्व कामे सोलापूर ग्रामीण-०२ उपविभागीय कार्यालयात करावी लागत होती. त्यामुळे वेळ, खर्च आणि त्रास सहन करावा लागत होता.
स्थानिक ग्रामस्थ आणि वीज ग्राहकांनी या निर्णयाचे स्वागत केले आहे. आमदार सुभाष देशमुख यांनी केलेल्या पाठपुराव्यामुळे हा मोठा प्रशासकीय दिलासा मिळाल्याचे मत नागरिकांनी व्यक्त केले.
नवीन उपविभागीय कार्यालयामुळे मंद्रूप व परिसरातील वीजसेवा अधिक परिणामकारक होऊन जनतेला तात्काळ सेवा मिळणार आहे. त्यामुळे तालुक्यातील नागरिकांच्या दीर्घकाळच्या मागणीची पूर्तता झाली आहे.
आमदार सुभाष देशमुख –
“मंद्रूप व दक्षिण सोलापूर तालुक्यातील नागरिकांची दीर्घकाळची मागणी होती. तिची पूर्तता करून आम्ही नागरिकांना सोयीस्कर सेवा मिळवून देण्याचा प्रयत्न केला आहे. नव्या कार्यालयामुळे सेवा अधिक जलद, पारदर्शक आणि परिणामकारक होईल.”
