TOP 25 । महापालिकेचा गैरकारभार : इलेक्ट्रो 12 दिवसासाठी 6 लाख , तर आनंद मेळ्यास 75 दिवसांसाठी 12 लाख

सोलापूर महापालिकेतील काही लिपिक तसेच कनिष्ठ अधिकारी वरिष्ठ अधिकाऱ्यांची दिशाभूल करून स्वतःचा गल्ला भरतात आणि महापालिकेला चुना लावतात. असाच एक प्रकार आता उघड होऊ लागला आहे. सोलापूर महापालिकेच्या भूमी मालमत्ता विभागाने इलेक्ट्रो प्रदर्शनाला तीन एकर जागेसाठी बारा दिवसाचे सहा लाख आठ हजार रुपये भाडे घेतले. सध्या या होम मैदानावर आनंद मेळा सुरू असून या प्रदर्शनासाठी तब्बल 75 दिवसासाठी अवघे बारा लाख 35 हजार रुपये भाडे घेतले आहे. हितेश माखेचा या दलालामार्फत साधे पत्र घेऊन त्यांनी ही जागा आनंद मेळाला दिली आहे. महापालिकेच्या काही बाबूंनी दिशाभूल करून या आनंदमेळा साठी हितेश माखेचा याच्यावर मेहेर नजर केली आहे. यामध्ये महापालिकेचे लाखो रुपयाचे नुकसान करून एका लिपिकाने सुमारे 4 लाख रुपये वरकमाई केल्याची चर्चा आहे. मनमानी पद्धतीने दर आकारून एकाला वेगळा न्याय तर दुसऱ्याला वेगळा न्याय असा प्रकार सर्रास होत असल्यामुळे गैरप्रकार होतात. सर्वसामान्य नागरिकांना पारदर्शक पद्धतीने ही भाडे प्रक्रिया समजू नये यासाठी ती मुद्दाम क्लिष्ट करून ठेवली आहे. आता या गंभीर प्रकरणाची महापालिका आयुक्त सचिन ओंबासे यांनी चौकशी करून महापालिकेला चुना लावणाऱ्या विरोधात कडक कारवाई करणे अपेक्षित आहे.