सोलापूर – विद्यार्थ्यांना अधिक दर्जेदार, सुरक्षित आणि आधुनिक शिक्षणाचे वातावरण उपलब्ध करून देण्याच्या उद्देशाने पद्मश्री सुमतीबाई इंग्लिश मीडियम स्कूलमध्ये पूर्व-प्राथमिक व प्राथमिक विभागातील नूतनीकरण केलेल्या वर्गखोल्यांचे उद्घाटन मंगळवार, ३० जून रोजी उत्साहात झाले.कार्यक्रमाची सुरुवात विद्यार्थी, पालक आणि शिक्षक यांच्या हस्ते सरस्वती पूजनाने झाली. यावेळी शाळेतील नवीन वर्गखोल्यांचे उद्घाटन करण्यात आले.
विद्यार्थ्यांच्या शिक्षणाचा अनुभव अधिक आनंददायी आणि प्रभावी व्हावा, यासाठी वर्गखोल्यांचे आकर्षक पद्धतीने नूतनीकरण करण्यात आले आहे. रंगीत आणि विद्यार्थ्यांना आकर्षित करणारे फर्निचर, सुंदर अंतर्गत सजावट तसेच स्मार्ट इंटरॲक्टिव्ह टीव्हींची सुविधा प्रत्येक वर्गात उपलब्ध करून देण्यात आली आहे. या सुविधांमुळे अध्यापन अधिक संवादात्मक, रंजक आणि परिणामकारक होण्यास मदत होणार आहे. तसेच विद्यार्थ्यांमधील जिज्ञासा, सर्जनशीलता आणि आत्मविश्वास वाढण्यासही या उपक्रमाचा हातभार लागणार आहे.
या उद्घाटन समारंभाला श्राविका संस्थेचे सचिव यतिन शहा, संस्थेचे विश्वस्त करण शहा, देवई शहा, मुख्याध्यापिका स्वाती कांबळे, अर्चना अक्कलकोटे, कल्पना रामावत, विभागप्रमुख, शिक्षक, पालक, विद्यार्थी तसेच शिक्षकेतर कर्मचारी मोठ्या संख्येने उपस्थित होते.
मूल्याधिष्ठित शिक्षणाची परंपरा जपत आधुनिक तंत्रज्ञानाचा प्रभावी वापर करून विद्यार्थ्यांचा सर्वांगीण विकास घडविण्यासाठी पद्मश्री सुमतीबाई इंग्लिश मीडियम स्कूल सातत्याने प्रयत्नशील आहे. विद्यार्थ्यांना गुणवत्तापूर्ण शिक्षणासोबतच उज्ज्वल भविष्यासाठी आवश्यक कौशल्ये मिळावीत, हा शाळेचा कायमचा प्रयत्न असल्याचे यावेळी शाळेतर्फे स्पष्ट करण्यात आले.
