TOP 25 । पड रं…पाण्या पड.. सोलापुरात झाला 70.5 मि.मी. पाऊस, शेतकरी सुखावले.. मनपा प्रशासन टेन्शनमध्ये…

यंदाच्या मोसमी हंगामातील पहिला दमदार आणि मुसळधार पाऊस काल सोलापूर शहर आणि जिल्ह्याने पाहिला. सोलापुरात गेले 24 तासात 70.5 मिलिमीटर पाऊस झाल्याची नोंद हवामान खात्याकडे झाली आहे. पंढरपूर, अक्कलकोट,माढा, करमाळा,माळशिरस आधी भागात देखील मुसळधार पाऊस झाल्यामुळे ओडे नाले भरून वाहू लागले आहेत. सोलापुरात काल दुपारी साडेतीन ते साडेचार या वेळेत 17.4 मिलिमीटर पाऊस झाला. रात्री सव्वा आठ ला सुरू झालेला पाऊस एक तास मुसळधार होता. त्यानंतर रात्रभर रिमझिम सुरू होता. या पावसामुळे नवी वेस पोलीस चौकी, विडी घरकुल, जुनी पोलीस लाईन, चौपाड अवंती नगर, सात रस्ता आदी सकल भागात पाणीच पाणी साचले होते. गांधीनगर,बिडी घरकुल, मजरेवाडी विजापूर रोड आधी अनेक भागात नागरिकांच्या घरात पाणी घुसले. 54 मीटर रस्त्यावर अवंती नगर येथे केलेल्या रेल्वे पुलाखाली पाणी साठल्यामुळे हा रस्ता काल रात्री नऊ वाजल्यापासून वाहतुकीसाठी बंद झाला होता. आज सकाळी मात्र या ठिकाणी एकेरी वाहतूक करण्यात आली आहे. शहरातील ड्रेनेजचे मेन हॉल स्वच्छ करणे , खड्डे बुजवणे, तसेच नाले खोलीकरणाचा या पावसाने बोजवारा उडाल्याचे दिसून आले. त्यामुळे या दमदार पावसाने शहर जिल्हा सुखावला असला तरीही महापालिका प्रशासन मात्र टेन्शनमध्ये आले आहे.