सोलापूर – “एस पी एम” पॉलिटेक्निक, कुमठे, सोलापूर येथील मेकॅनिकल इंजिनिअरिंग विभागाच्या विद्यार्थ्यांनी आपल्या गुणवत्ता, मेहनत आणि तांत्रिक कौशल्याच्या जोरावर यशाची नवी भरारी घेतली आहे. नामांकित “किर्लोस्कर फेरस” इंडस्ट्रीज लिमिटेड, सोलापूर यांच्या वतीने आयोजित करण्यात आलेल्या कॅम्पस प्लेसमेंट ड्राइव्हमध्ये कॉलेजमधील १० विद्यार्थ्यांची निवड झाली आहे.निवड झालेल्या विद्यार्थ्यांमध्ये प्रज्वल नंदेनी, रोहन क्षीरसागर, स्वप्नील बिराजदार, चिदानंद वस्त्रद, सुमित पवार, समर्थ पाटील, चैतन्य भोजणे, देवराज मठदेवरू, सोमनाथ शिलेनी व विठ्ठल नागशेट्टी यांचा समावेश आहे.
विद्यार्थ्यांच्या या यशामध्ये कॉलेजच्या ट्रेनिंग अँड प्लेसमेंट सेलचे अधिकारी प्रा. ज्ञानेश्वर जाधव, प्रा. सोमनाथ थळंगे तसेच मेकॅनिकल विभागातील सर्व प्राध्यापकांचे मोलाचे मार्गदर्शन लाभले. विद्यार्थ्यांना उद्योग क्षेत्राच्या गरजेनुसार तांत्रिक ज्ञान, मुलाखत कौशल्य, व्यक्तिमत्त्व विकास व रोजगाराभिमुख प्रशिक्षण देण्यात आले.
“एस पी एम”मध्ये विद्यार्थ्यांच्या सर्वांगीण विकासासाठी व रोजगारक्षमतेसाठी सातत्याने विविध उपक्रम राबविले जात आहेत. नामांकित कंपन्यांशी समन्वय साधून कॅम्पस प्लेसमेंटच्या माध्यमातून विद्यार्थ्यांना करिअरच्या उत्तम संधी उपलब्ध करून देण्यावर संस्थेचा विशेष भर आहे.
या उल्लेखनीय यशाबद्दल मुख्य विश्वस्त मा. जयकुमार माने, विश्वस्त स्वाती माने, प्राचार्या प्रा. रोहिणी चव्हाण यांनी निवड झालेल्या सर्व विद्यार्थ्यांचे अभिनंदन केले व त्यांच्या उज्ज्वल भविष्यासाठी शुभेच्छा दिल्या.
“विद्यार्थ्यांना उत्तम तांत्रिक शिक्षणासोबतच उद्योग क्षेत्रासाठी आवश्यक कौशल्ये देण्यावर संस्थेचा नेहमीच भर राहिला आहे. विद्यार्थ्यांचे हे यश म्हणजे संस्थेच्या गुणवत्तापूर्ण शिक्षण परंपरेचा गौरव आहे,” असे मत मुख्य विश्वस्त मा. जयकुमार माने यांनी व्यक्त केले.
“विद्यार्थ्यांचे यश हेच संस्थेच्या प्रगतीचे खरे प्रतीक आहे. विद्यार्थ्यांना तांत्रिक शिक्षणासोबतच उद्योग क्षेत्रात आवश्यक असणारी कौशल्ये, आत्मविश्वास आणि योग्य मार्गदर्शन देण्यासाठी संस्था सातत्याने प्रयत्नशील आहे. एस. पी. एमच्या विद्यार्थ्यांची नामांकित कंपनीत झालेली निवड ही विद्यार्थ्यांच्या मेहनतीसोबतच प्राध्यापकांच्या समर्पित प्रयत्नांचे फलित आहे. असे मनोगत विश्वस्त स्वाती माने यांनी व्यक्त केले.
याप्रसंगी प्रा. अतुल पत्की, विविध विभागाचे विभागप्रमुख प्रा. मल्लेशी बगले, प्रा गिरीजा दिक्षित, प्रा अनंत चौधरी, प्रा विवेक राशीनकर तसेच महाविद्यालयातील प्राध्यापक व कर्मचारी उपस्थित होते.
