हत्तूर : श्री सोमेश्वर शिक्षण प्रसारक मंडळ संचलित श्री सोमेश्वर हायस्कूल, हत्तूर येथे सोलापूर इंडस्ट्रीज असोसिएशनच्या वतीने पिंक रूम व मुलींसाठी स्वच्छतागृह उभारणीच्या कामाचे भूमिपूजन कार्यक्रम पार पडला. असोसिएशनचे अध्यक्ष डी. राम रेड्डी यांच्या वाढदिवसाचे औचित्य साधून हा कार्यक्रम आयोजित करण्यात आला असून, सहसचिव अभिषेक तापडिया यांच्या हस्ते भूमिपूजन संपन्न झाले.
यावेळी प्रशालेतील विद्यार्थी-विद्यार्थिनी व शिक्षकांनी टाळ्यांच्या गजरात राम रेड्डी यांना वाढदिवसाच्या शुभेच्छा दिल्या.पूरग्रस्त परिस्थितीमुळे शाळेतील मुलींच्या स्वच्छतागृहाचे नुकसान झाले होते. प्रशालेच्या संचालक मंडळाने केलेल्या विनंतीचा मान राखून, सोलापूर इंडस्ट्रीज असोसिएशनचे अध्यक्ष डी. राम रेड्डी तसेच संचालक मंडळाने हत्तूर येथील शाळेसाठी मुलींसाठी स्वतंत्र स्वच्छतागृह व पिंक रूम उभारणीस मंजुरी दिली होती. त्यानुसार या कामास आता प्रत्यक्ष सुरुवात करण्यात आली आहे.
या कार्यक्रमास असोसिएशनचे उपाध्यक्ष गणेश सुत्रावे, सहसचिव अभिषेक तापडिया, सहसचिव शिवशंकर आंधळकर, कार्यकारी सदस्य रामेश्वरी गायकवाड, व्यवस्थापक शुद्धोधन गायकवाड यांच्यासह प्रशालेचे मुख्याध्यापक शिवयोगी, शिक्षक-शिक्षिका, शिक्षकेतर कर्मचारी, पालक व विद्यार्थी-विद्यार्थिनी मोठ्या संख्येने उपस्थित होते.कार्यक्रमाचे सूत्रसंचालन गुरु अचलेरे यांनी केले, तर आभार प्रदर्शन सुधाकर बिराजदार यांनी मानले.
