जागतिक आंतरराष्ट्रीय एकल महिला (विधवा) दिनानिमित्त विशेष उपक्रम
सोलापूर- जागतिक आंतरराष्ट्रीय एकल महिला दिनानिमित्त सोलापूर महानगरपालिकेच्या उपमहापौर कार्यालयात एकल महिलांच्या समस्या, अडचणी व तक्रारी जाणून घेऊन त्यांचे तातडीने निराकरण करण्यासाठी विशेष संवाद बैठकीचे आयोजन करण्यात आले. उपमहापौर ज्ञानेश्वरी महेश देवकर यांच्या अध्यक्षतेखाली झालेल्या या बैठकीस विविध विभागांचे अधिकारी, सामाजिक कार्यकर्ते व मोठ्या संख्येने एकल महिला उपस्थित होत्या.
बैठकीत महिलांनी आपल्या जीवनातील संघर्ष, वेदना, सामाजिक व आर्थिक अडचणी याविषयी मनमोकळेपणाने मते व्यक्त केली. अनेक महिलांच्या समस्या ऐकून त्यावर संबंधित अधिकाऱ्यांमार्फत तत्काळ कार्यवाही करण्यात आली. महिलांचे मनोगत ऐकताना अनेकांना अश्रू अनावर झाले. यावेळी उपमहापौर देवकर यांनी त्यांना भावनिक आधार देत त्यांच्या पाठीशी खंबीरपणे उभे राहण्याची ग्वाही दिली.
कार्यक्रमात विविध क्षेत्रांत उल्लेखनीय कार्य करणाऱ्या १५ कर्तृत्ववान एकल महिलांचा विशेष सन्मान करण्यात आला. प्रत्येक महिलेला तुळशीचे रोप, ट्रॉफी व सन्मानचिन्ह देऊन गौरविण्यात आले.
या कार्यक्रमास स्थायी समितीच्या सभापती रंजिता चाकोते, उपआयुक्त सोनाली यादव, महिला व बालकल्याण अधिकारी अजित खानसोळे, ॲड. रेशमा बिराजदार, शिक्षिका गीतांजली यादव यांच्यासह अनेक मान्यवर उपस्थित होते.
यावेळी महात्मा ज्योतिराव फुले यांच्या २०० व्या जयंती वर्षानिमित्त त्यांनी विधवा महिलांच्या सन्मान, शिक्षण आणि पुनर्वसनासाठी केलेल्या ऐतिहासिक कार्याची माहिती उपस्थितांना देण्यात आली. समाजातील उपेक्षित महिलांना सन्मानाने जगण्याचा अधिकार मिळवून देण्यासाठी फुले दाम्पत्याने केलेल्या योगदानाचा गौरव करण्यात आला.
कार्यक्रमादरम्यान एकल महिला बचत गटाची स्थापना करण्यात आली. महाराष्ट्रातील एकल महिलांच्या सक्षमीकरणासाठी हा एक महत्त्वपूर्ण उपक्रम असून, महिलांना आर्थिकदृष्ट्या सक्षम बनविण्याच्या दिशेने हे मोठे पाऊल असल्याचे यावेळी सांगण्यात आले. शासनाने महिलांच्या सन्मानासाठी “विधवा” या शब्दाऐवजी “एकल महिला” हे संबोधन स्वीकारल्याचा उल्लेखही करण्यात आला.
उपमहापौर ज्ञानेश्वरी देवकर यांनी आपले कार्यालय एकल महिलांसाठी सदैव खुले असल्याचे सांगत त्यांच्या स्वयंरोजगार, आर्थिक सक्षमीकरण व स्वावलंबनासाठी सर्वतोपरी मदत करण्याचे आश्वासन दिले. याच कार्यक्रमात दोन एकल महिलांना स्वयंरोजगारासाठी व्यवसाय उभारणीची मदत देण्यात आली. तसेच बचत गटाच्या माध्यमातून अनेक महिलांना आर्थिक प्रगतीची नवी दिशा मिळणार असल्याचे सांगण्यात आले.
बैठकीत उपस्थित सर्व एकल महिला भगिनींचे अभिप्राय, सूचना, समस्या व मागण्या यांचा सविस्तर अहवाल महिला व बालकल्याण विभागाकडे सादर करण्यात येणार असून, महाराष्ट्र शासनाच्या विविध योजनांचा लाभ पात्र महिलांपर्यंत पोहोचविण्यासाठी पाठपुरावा केला जाईल, अशी माहिती उपमहापौर ज्ञानेश्वरी देवकर यांनी दिली.
एकल महिलांच्या सन्मान, स्वाभिमान आणि सक्षमीकरणासाठी आयोजित करण्यात आलेला हा उपक्रम उपस्थित महिलांसाठी प्रेरणादायी ठरला. कार्यक्रमाच्या शेवटी महिलांनी उपमहापौर ज्ञानेश्वरी देवकर यांच्याप्रती कृतज्ञता व्यक्त करत अशा उपक्रमांची सातत्याने अंमलबजावणी करण्याची अपेक्षा व्यक्त केली.
