पुणे ग्रँड टूरच्या दुसऱ्या पर्वासाठी पुणे जिल्ह्यात तब्बल ९०० कोटी रुपये खर्च करून ६६२ किलोमीटर लांबीचे रस्ते नव्याने तयार करण्यात येणार आहेत. जिल्हाधिकारी जितेंद्र डुडी यांनी या प्रकल्पाबाबत सार्वजनिक बांधकाम विभागाच्या अधिकाऱ्यांना अत्यंत कडक शब्दांत निर्देश दिले आहेत. रस्त्यांच्या कामांना १ सप्टेंबरपासून प्रत्यक्ष सुरुवात करून ३१ डिसेंबरपर्यंत सर्व कामे पूर्ण करण्याचे मोठे लक्ष्य निश्चित करण्यात आले आहे.
या महत्त्वाच्या कामांमध्ये कोणत्याही प्रकारचा राजकीय हस्तक्षेप खपवून घेतला जाणार नाही, अशी स्पष्ट ताकीद जिल्हाधिकाऱ्यांनी दिली आहे. तसेच कामांच्या गुणवत्तेशी कोणतीही तडजोड केली जाणार नाही आणि निकृष्ट दर्जाचे काम करणाऱ्या कंत्राटदारांवर थेट कारवाई करून त्यांना तत्काळ काळ्या यादीत (ब्लॅकलिस्ट) टाकण्यात येईल, असेही त्यांनी अधिकाऱ्यांना स्पष्ट केले आहे.
पुणे ग्रँड टूरच्या पहिल्या पर्वामध्ये जिल्ह्यातील आठ तालुक्यांमध्ये ४३७ किलोमीटरचे रस्ते तयार करण्यात आले होते. आता दुसऱ्या टप्प्यात ११ तालुक्यांमध्ये आणखी ६६२ किलोमीटरचे रस्ते नव्याने विकसित केले जातील. यातून दोन्ही पर्वांच्या माध्यमातून जिल्ह्यात एकूण १ हजार ९९ किलोमीटरचे दर्जेदार रस्ते तयार होणार आहेत. या दुसऱ्या पर्वातील कामांसाठी सार्वजनिक बांधकाम विभागाला सुमारे ३६५ कोटी रुपयांचा निधी उपलब्ध करून देण्यात आला आहे.
रस्त्यांची कामे निर्धारित वेळेत आणि योग्य मानांकनानुसारच पूर्ण झाली पाहिजेत. कामांच्या प्रत्येक टप्प्यावर गुणवत्ता नियंत्रण चाचण्या घ्याव्यात आणि वापरण्यात येणाऱ्या साहित्याचा दर्जा, रस्त्याची जाडी, डांबरीकरण तसेच आवश्यक सुरक्षाविषयक उपाययोजनांची नियमित तपासणी करावी, अशा सक्त सूचना देण्यात आल्या आहेत. केवळ कागदोपत्री कामे पूर्ण दाखविणे अजिबात खपवून घेतले जाणार नाही, असा कडक इशाराही जिल्हाधिकारी जितेंद्र डुडी यांनी दिला आहे.
