TOP 25 । प्राणी संग्रहालयासह सोलापुरातील रस्त्यांचे कोट्यावधी रुपयाचे प्रस्ताव मनपा बोर्डासमोर..!

सोलापूर महानगरपालिकेची मे महिन्यातील सर्वसाधारण सभा 20 मे रोजी सकाळी साडेअकरा वाजता आयोजित करण्यात आली आहे. महात्मा गांधी प्राणी संग्रहालयाच्या पुनर मंजुरीसाठी एनटीपीसी तसेच महापालिकेच्या माध्यमातून विविध कामे सुरू आहेत. या ठिकाणी सेंट्रल झू अथोरिटी ची पुन्हा मान्यता घेण्यासाठी काही महत्त्वाची कामे करावी लागणार असून याला प्रादेशिक पर्यटन विकास योजना किंवा dpdc मधून 15 कोटी रुपयांचा निधी मिळवण्याबाबतचा आमदार देवेंद्र कोठे यांनी जिल्हा नियोजन समितीकडे प्रस्ताव पाठवला आहे. त्यानुसार महापालिकेसमोर हा 14 कोटी 99 लाखांचा प्रस्ताव आला आहे. यासह सोलापूर शहरात रस्त्यांची विविध कामे करणे तसेच जिल्हास्तर नगरोत्थान अभियानातून कामे करण्याबाबत सुमारे सहा ते सात कोटी रुपयांचे प्रस्ताव आहे. भूमी मालमत्ता विभाग रस्त्यावर भाजीपाला विक्री करणाऱ्या विक्रेत्याकडून आता 25 रुपये ऐवजी 50 रुपये फी आकारणार आहेत. बकरे व मोठ्या जनावरांची कटिंग फी पूर्वी प्रति बकरा वीस रुपये आणि मोठ्या जनावरांची कटिंग फी 50 रुपये आकारली जात होती ती आता दुप्पट केली जाणार आहे. तसेच फूटपाथावर विनापरवाना व्यवसाय करणाऱ्या खोकी धारकाकडून दंडात्मक पावती दरमहा दोन हजार रुपये व चार चाकी हातगाडी साठी दंडात्मक पावती दरमहा 1000 रुपये वाढविण्याबाबतचा प्रस्ताव महापालिकेच्या सभेत मंजुरीसाठी प्रशासनाने पाठवला आहे. त्यामुळे 20 मे रोजी च्या सभेत या महत्त्वाच्या प्रस्तावांचा निर्णय होणार आहे.