पंढरपूर : पंढरपूर तालुक्यात दोन सख्ख्या भावांसह तीन शाळकरी मुलांचा शेततळ्यात बुडून मृत्यू झाला आहे. पंढरपूर तालुक्यातील करकंब गावात काल सायंकाळी ही घटना घडली आहे. या घटनेने करकंब गावावर शोककळा पसरली आहे. गणेश नितीन मुरकुटे (वय 7), हर्षवर्धन नितीन मुरकुटे ( वय 8) आणि मनोज अंकुश पवार (वय 11) अशी मृत झालेल्या मुलांची नावे आहेत. ही तीन लहान मुलं खेळत खेळत शेततळ्यामध्ये उतरली.
तळ्यातील पाण्याचा अंदाज न आल्याने तिन्ही मुलांचा पाण्यात बुडवून मृत्यू झाला. संध्याकाळी मुलं अजून कशी घरी परत आली नाहीत म्हणून आईवडिलांनी त्यांचा शोध सुरू केला. घराच्या जवळच असलेल्या परदेशी या शेतकऱ्यांच्या शेततळ्यात त्यांचे मृतदेह आढळून आले. तातडीने त्यांना करकंब येथील शासकीय रुग्णालयात दाखल केले असता डॉक्टरांनी तिन्ही मुलं मृत झाल्याचे रात्री घोषीत केले. एकाच वेळी तिन चिमुकल्यांचा मृत्यू झाल्याने परिसरात हळहळ व्यक्त केली जात आहे.
