सोलापूर जिल्ह्यात १४ हजार ८५२ किलो अन्नपदार्थांचा साठा जप्त; ३२ लाख ५६ हजार रुपयांचा माल ताब्यात
सोलापूर : दिवाळीच्या सणासुदीच्या काळात नागरिकांना सुरक्षित व दर्जेदार अन्नपदार्थ उपलब्ध व्हावेत, यासाठी अन्न व औषध प्रशासन विभागाने सोलापूर जिल्ह्यात विशेष तपासणी मोहीम राबविली आहे. या मोहिमेंतर्गत २८ ऑक्टोबर ते ६ नोव्हेंबर २०२६ या कालावधीत जिल्ह्यातील २५ आस्थापनांची तपासणी करण्यात आली असून, विविध अन्नपदार्थांचे ६९ नमुने विश्लेषणासाठी घेण्यात आले आहेत. तसेच कमी दर्जाचे असल्याच्या संशयावरून एकूण १४ हजार ८५२.६ किलो अन्नपदार्थांचा, अंदाजे ३२ लाख ५६ हजार ४०९ रुपये किमतीचा साठा जप्त करण्यात आला आहे. या मोहिमेत तेल, मिठाई, खवा, क्रीम, पनीर, पेढा, नमकीन पदार्थ आणि मसाले आदी अन्नपदार्थांचे नमुने घेण्यात आले आहेत.
अन्न व औषध प्रशासनाच्या अधिकारी उत्कर्षा एखंडे यांनी सहकारी अन्न सुरक्षा अधिकारी नंदिनी हिरेमठ व रेणुका पाटील यांच्यासमवेत ६ नोव्हेंबर रोजी अक्कलकोट येथील मे. रांगोळी स्वीट मार्ट या पेढीची तपासणी केली. यावेळी पेढा व स्वीट हलवा या पदार्थांचे दोन नमुने घेण्यात आले. तसेच ८२९ किलो, २ लाख ५० हजार २० रुपये किमतीचा साठा कमी दर्जाचा असल्याच्या संशयावरून जप्त करण्यात आला.
४ नोव्हेंबर रोजी अन्न व औषध प्रशासनाचे अधिकारी गणेश कदम यांनी सांगोला येथील मे. श्रीराज ॲग्रो टेक या आस्थापनाची तपासणी केली. यावेळी तेलाचे तीन नमुने घेण्यात आले असून, ३ हजार १४६.८ किलो, ६ लाख २९ हजार ३६० रुपये किमतीचा साठा जप्त करण्यात आला.
तसेच २८ ऑक्टोबर रोजी दक्षिण सोलापूर तालुक्यातील मे. एस. जी. ट्रेडर्स, गावडेवाडी, कंदलगाव येथे तेलाचे तीन नमुने घेण्यात आले. यावेळी ६ हजार २३५.४ किलो, १० लाख ६० हजार ५९९ रुपये किमतीचा साठा जप्त करण्यात आला. याच दिवशी दक्षिण सोलापूर तालुक्यातील मे. गणेश रामचंद्र आपटे प्रा. लि., अंत्रोळी येथे क्रीम व पनीर या पदार्थांचे चार नमुने घेऊन २ हजार २१६ किलो, ७ लाख १३ हजार ७०० रुपये किमतीचा साठा जप्त करण्यात आला.
जप्त करण्यात आलेल्या अन्नपदार्थांचे नमुने विश्लेषणासाठी प्रयोगशाळेत पाठविण्यात आले आहेत. या नमुन्यांचे विश्लेषण अहवाल प्राप्त झाल्यानंतर नियमानुसार पुढील कारवाई करण्यात येणार आहे.
दिवाळीच्या काळात विशेष दक्षता
सणासुदीच्या काळात भेसळयुक्त, निकृष्ट दर्जाचे अथवा उघड्यावरील अन्नपदार्थांमुळे ग्राहकांच्या आरोग्यास धोका निर्माण होऊ नये, यासाठी प्रशासनाकडून विशेष दक्षता घेण्यात येत आहे. अन्नपदार्थांची साठवणूक, स्वच्छता, वापरण्यात येणारे तेल, रंग तसेच इतर घटकांची गुणवत्ता यांची काटेकोर तपासणी करण्यात येत आहे.
ही कारवाई अन्न व औषध प्रशासन, मुंबईचे अन्न सुरक्षा आयुक्त तुकाराम मुंढे, पुणे विभागाचे सहआयुक्त (अन्न) श्रीकांत करकळे आणि सोलापूरचे सहायक आयुक्त (अन्न) सा. ए. देसाई यांच्या मार्गदर्शनाखाली अन्न सुरक्षा अधिकारी नंदिनी हिरेमठ, रेणुका पाटील, मंगेश लवटे, गणेश कदम, कीर्ती देशमुख व उत्कर्षा एखंडे यांनी पूर्ण केली.
जिल्ह्यातील अन्न आस्थापनांची तपासणी यापुढेही सुरू राहणार आहे. अन्न व्यावसायिकांनी अन्न सुरक्षा व मानदे कायद्यातील नियमांचे काटेकोर पालन करावे. तपासणीदरम्यान नियमांचे उल्लंघन आढळल्यास संबंधितांवर नियमानुसार कारवाई करण्यात येईल, असे आवाहन अन्न व औषध प्रशासनाचे सहायक आयुक्त (अन्न) सा. ए. देसाई यांनी केले आहे.
