सोलापूर डिस्ट्रिक्ट क्रिकेट असोसिएशन आणि ग्रीन फिंगर स्कूल यांच्या संयुक्त विद्यमाने माजी उपमुख्यमंत्री विजयसिंह मोहिते पाटील यांच्या वाढदिवसानिमित्त एकदिवसीय क्रिकेट स्पर्धेचे आयोजन करण्यात आले आहे. या स्पर्धेचे उद्घाटन महानगरपालिका सभागृह नेते नरेंद्र काळे यांच्या हस्ते उत्साहात पार पडले.
याप्रसंगी बोलताना नरेंद्र काळे म्हणाले की, “खेळाडूंच्या प्रगतीसाठी महानगरपालिकेच्या वतीने जे काही सहकार्य लागेल ते पूर्णपणे दिले जाईल. महापौर चषकासाठी विशेष निधीची तरतूद करण्यात आली असून, क्रीडाविषयक प्रश्नांवर महापालिका सकारात्मक आहे. क्रीडा विकासासाठी काही नवीन योजना असतील, तर त्याचा आराखडा तयार करून द्यावा,” असे आवाहनही त्यांनी यावेळी केले. कार्यक्रमाची प्रस्तावना सचिव चंद्रकांत रेंबुर्स*यांनी केली, तर सूत्रसंचालन उपाध्यक्ष प्रकाश भुतडा यांनी केले. शेवटी संतोष बडवे यांनी उपस्थितांचे आभार मानले. या उद्घाटन प्रसंगी टूर्नामेंट कमिटी चेअरमन संजय वडजे, सुनील मालप, राजेंद्र गोटे, रोहित जाधव, सत्यजीत जाधव, संजय मोरे, योगेश कोंपल, नीलेश गायकवाड, राजू रंगम, सुनील चव्हाण, चिराग शहा यांच्यासह अनेक क्रीडाप्रेमी व खेळाडू उपस्थित होते.
