येस न्युज मराठी नेटवर्क : सोलापूर विजयपूर महामार्गावर पूणेरोड केगाव ते हत्तूर बायपास चार पदरी रिंगरोड तयार करण्यात आला आहे. या महामार्गावर केगाव येथील देशमुख वस्तीजवळ अंडरपासवर 28 जानेवारी रोजी संध्याकाळी 15 काळवीट पुलावरून खाली पडून 12 काळविटांचा जागीच मृत्यु तर दोन काळविटांचा उपचारादरम्यान मृत्यू झाला होता. एक काळविटावर पूण्यात उपचार सुरु आहेत. या घटनेचे सोलापूर व राज्यात तीव्र पडसाद उमटले होते. सोलापुरातील विविध पर्यावरण संस्थांनी याबाबत निषेध व्यक्त केला होता.
तर नागरीकांनी चौकाचौकात श्रद्धांजली सभा घेतल्या होत्या. घटनेची चौकशी करुन कारवाई करणेबाबत जीआयबी फाउंडेशन आणि डब्लूसीएएस या संस्थाकडून जिल्हाधीकारी यांना निवेदन देण्यात आले होते. घटनेची चौकशी करुन तातडीने केंद्र सरकारच्या वने व हवामानबदल विभागास अहवाल सादर करणेकरीता अप्पर प्रधान वन्यजीवरक्षक पश्चिम विभाग मुंबईचे श्री. बेन साहेब यांनी घटनास्थळी भेट दिली होती.
▪️ या घटनेनंतर दोन महिने उलटूनही कोणत्याही प्रकारचे ठोस कारवाई किंवा उपाययोजना झाली नसल्याने दिनांक 15 मार्च 2023 रोजी पुन्हा पर्यावरणप्रेमी संस्थांकडून उपवनसंरक्षक सोलापूर वनविभाग प्रादेशीक यांच्या कार्यालयासमोर धरणे आंदोलन करण्यात आले होते व यावर तत्काळ कारवाई करणेबाबत उपवन संरक्षक कार्यालयाच्या अधिक्षकांना निवेदन दिले होते. या आंदोलनाची दखल घेऊन चारच दिवसात धरणे आंदोलनात मागणी केलेल्या हरणांच्या दुर्घटनाग्रस्त ठिकाणी पुलावर जाळीचे अवरोध उभारण्याचे काम एन.एच.ए.आय. च्या वतीने आयबीएम इंडिया इन्फ्रास्ट्रक्चर प्रायव्हेट लिमिटेड या कंपनीच्या माध्यमातून सुरु झाले. दोन फूट उंचीचा कठडा आणि आठ फूट जाळीचे असे एकूणदहा फूट अवरोध पूलाच्या दोन्ही बाजूने उभारण्यात येत आहे. या कामाची सुरूवात आज जागतीक वनदिनाचे औचित्य साधून वनपरीक्षेत्र अधिकारी माळढोक पक्षीअभयारण्य नान्नज सौ. शुभांगी जावळे यांच्या हस्ते केली गेली. या प्रसंगी नान्नज अभयारण्यचे वनपाल संतोष मुंडे , मारुती गवळी, सारंग म्हमाणे, जीआयबी फाउंडेशनचे अध्यक्ष पंकज चिंदरकर, डब्लूसीएएसचे सचिव सुरेश शिरसागर NHAI चे आभियंता अमित पांडे, व्यकटेश्वर राव, मल्लेश्वर राव हे उपस्थित होते. हे काम येत्या पंचविस ते तीस दिवसात पुर्ण करण्याची योजना आहे असून या कामाच्या देखरेखीसाठी सहाय्यक वन संरक्षक वनविभाग प्रादेशीक, वनपरिक्षेत्र अधीकारी माळढोक अभयारण्य नान्नज,वनपरीक्षेत्र अधिकारी रोहयो सोलापूर यांची त्रीसदस्सीय समीती नेमण्यात आली आहे
