प्रभाग क्रमांक २६ मधील कल्याणनगर भागात पावसाळ्यात नाल्यामुळे निर्माण होणाऱ्या गंभीर समस्यांची दखल घेत सोलापूर महानगरपालिका आयुक्त सचिन ओम्बासे यांनी संपूर्ण परिसराची तब्बल दोन तास पायी फिरून सविस्तर पाहणी केली. पावसाळ्यापूर्वी या समस्येवर कायमस्वरूपी तोडगा काढण्याच्या दृष्टीने ही पाहणी अत्यंत महत्त्वाची मानली जात आहे.कल्याणनगर परिसरातील नाल्याचा प्रश्न गेल्या अनेक वर्षापासून प्रलंबित आहे. पावसाळ्यात या नाल्याचे पाणी रस्त्यावर आणि थेट नागरिकांच्या घरात शिरून मोठे नुकसान होते. या गंभीर समस्येकडे स्थानिक नगरसेवक जयकुमार माने यांनी सातत्याने महापालिका प्रशासनाकडे पाठपुरावा केला होता. त्यांच्या या प्रयत्नांना यश आले असून, स्वतः आयुक्तांनी या भागाची प्रत्यक्ष पाहणी केली.या पाहणी दौऱ्यादरम्यान आयुक्त ओम्बासे यांच्यासोबत नगरसेवक जयकुमार माने, नगरसेविका संगीता जाधव, महानगरपालिकेचे वरिष्ठ अधिकारी आणि संबंधित झोन अधिकारी उपस्थित होते.
दौऱ्यादरम्यान आयुक्त सचिन ओम्बासे यांनी कल्याणनगर परिसरातील स्थानिक नागरिकांशी थेट संवाद साधून त्यांच्या अडचणी जाणून घेतल्या. नगरसेवक जयकुमार माने यांनी पावसाळ्यात होणाऱ्या नुकसानीची माहिती आयुक्तांना दिली.या नाल्याचे काम तांत्रिकदृष्ट्या कशा पद्धतीने मार्गी लावता येईल, याचा सविस्तर आढावा घेत आयुक्तांनी उपस्थित अधिकाऱ्यांना तात्काळ आवश्यक त्या उपाययोजना करण्याचे निर्देश दिले. तसेच, या भागातील समस्या लवकरच सोडवली जाईल, असे आश्वासन त्यांनी नगरसेवक व नागरिकांना दिले.दीर्घकाळापासून प्रलंबित असलेल्या या प्रश्नाची गांभीर्याने दखल घेत स्वतः आयुक्तांनी दोन तास परिसरात फिरून पाहणी केल्याबद्दल स्थानिक नगरसेवक जयकुमार माने, नगरसेविका संगीता जाधव आणि कल्याणनगरमधील नागरिकांनी महापालिका आयुक्त सचिन ओम्बासे यांचे जाहीर आभार मानले आहेत.या पाहणी दौऱ्यावेळी पी. आर. कुलकर्णी, संभाजी ब्रिगेडचे श्याम कदम, इरेश खुने, श्याम पाटील, सचिन चौधरी यांच्यासह परिसरातील नागरिक उपस्थित होते.
