सोलापूर : डॉ. श्री नानासाहेब धर्माधिकारी प्रतिष्ठान रेवदंडा, ता. अलिबाग, जि. रायगड यांच्या वतीने रविवार, दिनांक १ मार्च २०२६ रोजी सोलापूर शहरात व्यापक स्वच्छता अभियान राबविण्यात येणार आहे. शहरातील विविध शासकीय कार्यालये, सिव्हिल हॉस्पिटल, सर्व समाजांच्या स्मशानभूमी तसेच पोलीस आयुक्त कार्यालय आणि सर्व पोलीस स्टेशन येथे ही स्वच्छता मोहीम पार पडणार आहे.
तीर्थरूप नानासाहेब धर्माधिकारी यांच्या जयंतीनिमित्त संपूर्ण महाराष्ट्रात स्वच्छता अभियान राबविण्याचे नियोजन करण्यात आले असून, हे अभियान डॉ. अप्पासाहेब धर्माधिकारी व डॉ. सचिन दादा धर्माधिकारी यांच्या मार्गदर्शनाखाली होत आहे.
याच उपक्रमाचा एक भाग म्हणून सोलापूर शहरातील सर्व शासकीय कार्यालये, छत्रपती शिवाजी महाराज सर्वोपचार रुग्णालय, सर्व समाजांच्या स्मशानभूमी तसेच पोलीस आयुक्त कार्यालय आणि सर्व पोलीस ठाण्यांमध्ये स्वच्छता मोहीम राबविण्यात येणार आहे. या अभियानात सोलापूर शहर व परिसरातील सुमारे 2500 पेक्षा श्री सदस्य सहभागी होऊन श्रमदान करणार आहेत.
प्रतिष्ठानने यापूर्वीही सोलापूर शहरात वेळोवेळी स्वच्छता अभियान राबवले असून, शहर व परिसरातील अनेक रस्ते आणि सार्वजनिक ठिकाणी वृक्षलागवड करून त्यांचे संगोपन केले आहे. तसेच शहर व जिल्ह्यात जलपुनर्भरणाचे मोठे उपक्रम हाती घेऊन पुनर्भरणाची कामे यशस्वीरीत्या पूर्ण केली आहेत.
कुंभारी येथील रे नगर परिसरात प्रतिष्ठानच्या वतीने गेल्या दोन वर्षांपासून सुमारे ३ हजार वृक्षांची लागवड व संवर्धनाचे कार्य सातत्याने सुरू आहे.
१ मार्च २०२६ रोजी होणाऱ्या या स्वच्छता अभियानात नागरिकांनी मोठ्या संख्येने सहभागी होऊन जनजागृतीस हातभार लावावा आणि स्वच्छतेच्या चळवळीला गती द्यावी, असे आवाहन प्रतिष्ठानच्या वतीने करण्यात आले आहे.
