नागपंचमीनिमित्त आस्था रोटी बँकेकडून २०० निराधार व गरजू महिलांना स्नेहभेट
सोलापूर : कुणाच्या घरी सणाच्या दिवशी गोडधोडाचा सुगंध दरवळतो, नवीन वस्तूंची खरेदी होते आणि कुटुंबासोबत आनंद साजरा होतो… पण याच समाजात काही माऊली अशाही आहेत, ज्यांच्यासाठी “आज सण आहे” यापेक्षा “आज पोटाला अन्न मिळेल का?” हा प्रश्न अधिक मोठा असतो. अशाच निराधार, गरजू आणि वंचित महिलांच्या आयुष्यात नागपंचमीचा आनंद घेऊन जाण्याचे काम आस्था फाउंडेशन संचलित आस्था रोटी बँक, सोलापूर यांनी केले.
“जिथे भाकरीसोबत माया वाटली जाते आणि मदतीसोबत माणुसकी जपली जाते” या भावनेतून नागपंचमीनिमित्त शहरातील विविध भागांतील तब्बल २०० आजी-माऊली व गरजू महिलांना स्नेहभेट किटचे वाटप करण्यात आले.
आपल्यासाठी मेहंदी, बांगड्या, टिकली किंवा कानातले या छोट्या गोष्टी असतील; पण आयुष्यभर परिस्थितीशी संघर्ष करणाऱ्या एखाद्या निराधार माऊलीच्या हातावर मेहंदी रंगते, हातात बांगड्या खणखणतात आणि चेहऱ्यावर हसू उमटते, तेव्हा ती भेट केवळ वस्तू राहत नाही—ती “आपलीही कुणीतरी आठवण ठेवते” याची जाणीव बनते.
या स्नेहभेट किटमध्ये मेहंदी, नेलपॉलिश, चिमटा, मोत्याची माळ, कंगवा, पावडर, हातरुमाल, बांगड्या, कानातले आणि टिकली अशा महिलांच्या उपयोगातील वस्तूंचा समावेश होता.
मातोश्री मुलींचे आश्रम, आधार आश्रम, कुष्ठरोग वसाहत तसेच शहरातील विविध झोपडपट्ट्यांमध्ये राहणाऱ्या गरीब, गरजू व निराधार महिलांपर्यंत तसेच अंध व अपंग बांधवांपर्यंत आस्था रोटी बँकेच्या कार्यकर्त्यांनी हा सणाचा आनंद पोहोचविला.
काहींच्या आयुष्यात सण येतात आणि जातात; मात्र गरिबीमुळे सण साजरा करण्याची संधीचमिळत नाही. दोन वेळच्या अन्नाची भ्रांत असताना मेहंदी, बांगड्या किंवा सणाची भेट घेणे त्यांच्यासाठी स्वप्नासारखे असते. त्यामुळे या छोट्याशा स्नेहभेटीने अनेक महिलांच्या चेहऱ्यावर उमटलेले हास्य आणि त्यांच्या डोळ्यांतील समाधान हेच या उपक्रमाचे खरे यश ठरले.
आस्था रोटी बँक केवळ सण-उत्सवाच्या दिवशीच नव्हे, तर वर्षभर सोलापूर शहरातील गोरगरीब, गरजू, निराधार, अंध, अपंग, कुष्ठरोग वसाहतीतील नागरिक तसेच सिव्हिल हॉस्पिटलमधील रुग्ण व त्यांच्या नातेवाईकांना दररोज मोफत अन्नदान करत आहे.
“आमच्यासाठी सण म्हणजे स्वतःच्या घरात दिवा लावणे नव्हे, तर परिस्थितीने ज्यांच्या आयुष्यात अंधार केला आहे, त्यांच्या चेहऱ्यावर थोडेसे हास्य फुलवणे. कोणीही उपाशी राहू नये आणि कोणालाही आपण एकटे आहोत असे वाटू नये, हाच आस्था रोटी बँकेचा प्रयत्न आहे,” असा संदेश यावेळी देण्यात आला.
या सेवाभावी कार्यक्रमाला प्रमुख पाहुणे म्हणून वंदना सोमशेट्टी, राघवेंद्र सोमशेट्टी, सौजन्य आले, अंबिका गुरव, अनिता हिरेमठ, जगदेवी स्वामी, यमुना गड्डम आणि राधा वहिनी उपस्थित होते.
कार्यक्रम यशस्वी करण्यासाठी पुष्कर पुकाळे, विद्या सिंगम, स्नेहा मेहता, संगीता छचुरे, सुरेखा पाटील, विनोद भोसले, अनिता तालीकोटी व विजय छचुरे यांच्यासह आस्था रोटी बँकेच्या सर्व सदस्यांनी परिश्रम घेतले.
“त्या माऊलीच्या हातातील बांगड्यांची खणखण हीच आमच्यासाठी नागपंचमीची खरी पूजा… आणि तिच्या चेहऱ्यावर उमटलेले हास्य हाच आमच्यासाठी सर्वात मोठा आशीर्वाद!”
