येस न्युज मराठी नेटवर्क : राज्यात उघडकीस येत असलेल्या पेपरफुटी प्रकरणावरून राजकारण तापण्याची शक्यता आहे. राज्य मंत्रिमंडळातील मंत्र्याचा सहभाग असल्याचा दावा भाजप आमदार प्रसाद लाड यांनी केला आहे. या संदर्भातील पुरावे पटलावर ठेवणार असल्याचे त्यांनी सांगितले. राज्यात आजपासून सुरू होत असलेल्या विधीमंडळ अधिवेशनात पेपरफुटीचे प्रकरण गाजण्याची शक्यता आहे. भाजप आमदार प्रसाद लाड यांनी खळबळजनक दावा करत या घोटाळ्यात मंत्र्याचा समावेश असल्याचे सांगितले.
लाड यांनी सांगितले की, पेपरफुटी प्रकरणात मंत्रिमंडळातील मंत्र्यांचा समावेश आहे. आम्ही यासंदर्भातील पुरावे पटलावर ठेऊ. या प्रकरणात गृहनिर्माण मंत्री, शिक्षण मंत्री यांची चौकशी झाली पाहिजे अशी मागणी त्यांनी केली. प्रसाद लाड यांनी म्हटले की, पेपरफुटी प्रकरणात आम्ही सीबीआय चौकशीची मागणी केली आहे. जर सरकारने सीबीआय चौकशी मागणी पूर्ण केली नाही तर आम्ही न्यायालयात जाऊन मागणी करणार असल्याचेही त्यांनी सांगितले. सध्या पोलिसांकडून या प्रकरणाची चौकशी सुरू आहे. मात्र, त्यांच्यावर मंत्र्यांचा दबाव असल्याचा दावा लाड यांनी केला आहे.
