सांगोला तालुक्यातील निजामपूर गावातील निजामपूर हायस्कूलमधील एका शिक्षिकेचला नियमबाह्य अतिरिक्त ठरवण्यात आले आहे.मुख्याध्यापक संस्था व शालेय प्रशासनाने अन्याय केल्याच्या निषेधार्थ महाराष्ट्र राज्य शिवछत्रपती शिक्षक संघटनेने 5 जानेवारीपासून आमरण उपोषणाचा इशारा दिला आहे. या प्रश्नी शिक्षक आमदार आमदार ज्ञानेश्वर म्हात्रे यांनी लक्ष घातले आहे.
या घटनेची सविस्तर माहिती अशी की मीनाक्षी पाटील या निजामपूर हायस्कूल येथे सहशिक्षिका म्हणून 15 जून 1999 पासून सहशिक्षिका म्हणून कार्यरत आहेत. मीनाक्षी पाटील यांना मुख्याध्यापक, संस्था व शालेय प्रशासनाने नियमबाह्य पद्धतीने 31 ऑक्टोबर 2017 रोजी अतिरिक्त ठरविले होते. याविरुद्ध न्यायालयात दाद मागितले असता नियमबाह्य अतिरिक्त ठरवल्याचे नमूद करत मुंबई उच्च न्यायालयाने शिक्षिका मीनाक्षी पाटील यांचे मागील आठ वर्षाचे थकीत वेतन, दरसाल मिळणारी वेतनवाढ, सातवा वेतन आयोग लागू करणे, फंडाचे पाच हप्ते व सेवा पुस्तिका अद्यावत करून देण्याचा निर्णय दिला.
न्यायालयाच्या निर्णयाची अंमलबजावणी न करता मुख्याध्यापकांनी न्यायालयाचा आदेश झिडकारत उच्च न्यायालयाची अवहेलना केली आहे. याबाबत मीनाक्षी पाटील यांनी पत्रांनुसार वारंवार तोंडी, लेखी निवेदने अर्ज देऊनही मुख्याध्यापकांनी कोणतीही कार्यवाही केली नाही. मीनाक्षी पाटील यांना मानसिक, आर्थिक व सामाजिक त्रास सहन करावा लागत आहे. सदर शिक्षिकेच्या न्यायालयीन आदेशान्वये वरील कार्यवाही तात्काळ पूर्ण न केल्यास दिनांक 5 जानेवारी 2026 पासून निजामपूर हायस्कूलसमोर आमरण उपोषण करण्याचा इशारा संघटनेने दिला आहे.
उपोषणादरम्यान काही अनुचित घटना घडल्यास अथवा सदर शिक्षिकेच्या जीवितेस धोका निर्माण झाल्यास त्याची संपूर्ण नैतिक व कायदेशीर जबाबदारी संस्था व मुख्याध्यापकावर राहील असा इशारा संघटनेचे पश्चिम महाराष्ट्र विभागाचे अध्यक्ष आप्पासाहेब पाटील, जिल्हाध्यक्ष प्रसाद मसरे, जिल्हा सरचिटणीस जुबेर मुजावर आणि शहराध्यक्ष काशिनाथ माळगोंडे यांनी दिला आहे.
