मजूर सहकारी संस्थांच्या कामांची मर्यादा ३० लाखांपर्यंत करा

सोलापूर जिल्हा लेबर फेडरेशनने मजूर सहकारी संस्थांना देण्यात येणाऱ्या सार्वजनिक बांधकामांच्या कामांची मर्यादा १० लाखांवरून ३० लाख रुपयांपर्यंत वाढवावी, अशी मागणी केली आहे. तसेच संस्थांच्या विविध प्रलंबित मागण्यांवर शासनाने तातडीने सकारात्मक निर्णय घ्यावा, अशी मागणी करण्यात आली. या मागणीसंदर्भात सोलापूर जिल्हा लेबर फेडरेशनच्या शिष्टमंडळाने सार्वजनिक बांधकाम मंत्री शिवेंद्रराजे भोसले यांची भेट घेऊन निवेदन सादर केले. यावेळी आमदार समाधान आवताडे यांच्या नेतृत्वाखाली शिष्टमंडळाने मजूर सहकारी संस्थांच्या अडचणी आणि विविध मागण्या मंत्र्यांसमोर मांडल्या. यावेळी फेडरेशनचे अध्यक्ष शंकर चौगुले आणि माजी संचालक सरफराज काझी उपस्थित होते. मजूर सहकारी संस्थांना कामे मिळवताना येणाऱ्या अडचणी, शासनदरबारी प्रलंबित प्रश्न आणि संस्थांच्या हक्कांसाठी सुरू असलेल्या पाठपुराव्याची माहिती यावेळी देण्यात आली. मजूर सहकारी संस्थांना अधिक कामांची संधी मिळाल्यास कामगारांच्या रोजगाराचे संरक्षण होऊन त्यांच्या आर्थिक आणि सामाजिक विकासाला चालना मिळेल, असा विश्वास शंकर चौगुले यांनी व्यक्त केला. संस्थांच्या न्याय्य हक्कांसाठी संघर्ष सुरूच राहणार असल्याचेही त्यांनी सांगितले मंत्री शिवेंद्रराजे भोसले यांनी या मागण्यांबाबत सकारात्मक भूमिका घेत तातडीने निर्णय घेण्याचे आश्वासन दिल्याचे फेडरेशनकडून सांगण्यात आले.