सोलापूर-सोलापूर जिल्ह्यातील माता व बाल आरोग्य सेवांना बळकटी देणारा आणि हजारो नवजात बालकांसाठी जीवनदायी ठरणारा अत्याधुनिक “रोटरी नवजात शिशु अतिदक्षता विभाग (NICU)” महिला व नवजात शिशु रुग्णालय, गुरुनानक चौक, सोलापूर येथे उभारण्यात आला असून त्याचे उद्घाटन शनिवार, दि. 27 जून 2026 रोजी सकाळी 11 वाजता मान्यवरांच्या उपस्थितीत संपन्न होणार आहे.
हा महत्त्वाकांक्षी प्रकल्प रोटरी ई-क्लब ऑफ सोलापूर इलाइट (R.I. Dist. 3132, India), रोटरी क्लब ऑफ नोवी (R.I. Dist. 6380, USA), टी. बी. लुल्ला चॅरिटेबल ट्रस्ट (USA) आणि द रोटरी फाउंडेशनच्या ग्लोबल ग्रँट क्र. GG2683966 यांच्या संयुक्त आर्थिक सहकार्याने साकार झाला आहे.
सोलापूर जिल्हा आणि परिसरातील ग्रामीण भागामध्ये दरवर्षी मोठ्या प्रमाणात अकाली जन्मलेली, कमी वजनाची तसेच विविध आरोग्य समस्यांनी ग्रस्त नवजात बालके उपचारासाठी दाखल होत असतात. अशा बालकांच्या उपचारासाठी अत्याधुनिक वैद्यकीय सुविधा उपलब्ध असणे अत्यंत आवश्यक असते. नव्याने सुरू होणाऱ्या या NICU विभागामध्ये आधुनिक वैद्यकीय उपकरणे उपलब्ध करून देण्यात आली असून त्यामुळे गंभीर अवस्थेतील नवजात बालकांना तातडीने आणि गुणवत्तापूर्ण उपचार मिळू शकणार आहेत.
आजपर्यंत अनेक कुटुंबांना नवजात बालकांच्या विशेष उपचारांसाठी पुणे, मुंबई किंवा इतर महानगरांमध्ये जावे लागत होते. त्यामुळे वेळ, पैसा आणि मानसिक तणावाचा मोठा भार सहन करावा लागत होता. या नव्या सुविधेमुळे सोलापूर जिल्हा तसेच आसपासच्या ग्रामीण भागातील हजारो कुटुंबांना त्यांच्या जिल्ह्यातच उच्च दर्जाची आरोग्यसेवा उपलब्ध होणार असून नवजात बालमृत्यू दर कमी करण्यास मोठी मदत होणार आहे. माता व बाल आरोग्य क्षेत्रात हा प्रकल्प सोलापूर जिल्ह्यासाठी एक मैलाचा दगड ठरणार आहे.
उद्घाटन समारंभास प्रमुख पाहुणे म्हणून एस. कार्तिकेयन (भा.प्र.से.), जिल्हाधिकारी, सोलापूर, कुशल जैन (भा.प्र.से.), मुख्य कार्यकारी अधिकारी, जिल्हा परिषद सोलापूर, प्रांतपाल रो. सुधीर लाडरे, मा. PDG रो. स्वाती हेरकल, मा. DGE रो. जयेश पटेल, किशोर लुल्ला, डॉ. वर्षा डोंगफोडे आणि डॉ. सतीश कोपुरवाड यांची प्रमुख उपस्थिती लाभणार आहे.
या प्रकल्पाच्या यशस्वी उभारणीत PDG रो. स्वाती हेरकल यांचे योगदान विशेष उल्लेखनीय आहे. ग्लोबल ग्रँट प्रक्रियेमध्ये त्यांचे तांत्रिक मार्गदर्शन, नियोजन आणि सातत्यपूर्ण पाठपुरावा यामुळे हा प्रकल्प यशस्वीरित्या पूर्णत्वास जाऊ शकला. तसेच DGE रो. जयेश पटेल यांनी प्रकल्पाला सातत्याने प्रोत्साहन देत आवश्यक नेतृत्व आणि समन्वय उपलब्ध करून दिला.
या संपूर्ण प्रकल्पाच्या यशामागे प्रकल्प समन्वयक रो. अजय डोईजोडे यांचे विशेष आणि मोलाचे योगदान राहिले आहे. सोलापूर जिल्ह्यासाठी अत्याधुनिक NICU सुविधा उपलब्ध व्हावी या ध्येयाने त्यांनी अनेक महिन्यांपासून सातत्यपूर्ण प्रयत्न केले. ग्लोबल ग्रँट प्रस्ताव तयार करणे, परदेशातील भागीदार रोटरी क्लब आणि टी. बी. लुल्ला चॅरिटेबल ट्रस्ट यांच्याशी समन्वय साधणे, आवश्यक प्रशासकीय प्रक्रिया पूर्ण करणे, शासकीय अधिकाऱ्यांशी सातत्याने पाठपुरावा करणे, रुग्णालय प्रशासनाशी समन्वय राखणे तसेच प्रकल्पाच्या प्रत्येक टप्प्यावर वैयक्तिक लक्ष देऊन त्यांनी हा प्रकल्प यशस्वीपणे पूर्णत्वास नेला.
त्यांच्या दूरदृष्टी, चिकाटी आणि अथक परिश्रमांमुळे सोलापूर जिल्ह्याला अत्याधुनिक वैद्यकीय सुविधा प्राप्त झाली असून हजारो नवजात बालकांच्या जीवनरक्षणासाठी हा प्रकल्प वरदान ठरणार आहे. सामाजिक बांधिलकी, सेवाभाव आणि परिणामकारक नेतृत्व यांचे हे उत्कृष्ट उदाहरण मानले जात आहे.
रोटरी ई-क्लब ऑफ सोलापूर इलाइटचे अध्यक्ष बालमुकुंद राठी, प्रकल्प समन्वयक अजय डोईजोडे, सचिव रोशन भुतडा, खजिनदार राहुल डांगरे यांनी सर्व नागरिकांना या ऐतिहासिक उद्घाटन सोहळ्यास उपस्थित राहण्याचे आवाहन केले आहे
