सोलापूर – उत्तर सोलापूर तालुक्यातील मौजे कोटाळी येथे सोलार प्लेट व पॅनल स्टर अँगल चोरीप्रकरणी सोलापूर तालुका पोलीस ठाण्याने मोठी कारवाई करत संशयित आरोपींना अटक केली असून त्यांच्याकडून एकूण १० लाख ७८ हजार १३० रुपये किमतीचा मुद्देमाल हस्तगत करण्यात आला आहे.
मौजे कोटाळी येथे रोडवर सुरू असलेल्या सोलार प्रकल्पाच्या ठिकाणी सोलार प्लेट व पॅनल स्टर अँगल ठेवण्यात आले होते. दिनांक २३ नोव्हेंबर २०२५ रोजी सकाळी ११ ते १८ जानेवारी २०२६ रोजी सकाळी १० वाजेच्या दरम्यान अज्ञात इसमांनी या साहित्याची चोरी केल्याची घटना उघडकीस आली होती. याप्रकरणी संबंधित ठेकेदाराकडून दिलेल्या फिर्यादीवरून दिनांक १९ जानेवारी २०२६ रोजी सोलापूर तालुका पोलीस ठाण्यात चोरीचा गुन्हा दाखल करण्यात आला होता.
या गुन्ह्याचा तपास पोलीस निरीक्षक राहुल देशपांडे यांच्या मार्गदर्शनाखाली पोलीस उपनिरीक्षक व तपास पथकाकडे सोपविण्यात आला. मिळालेल्या गोपनीय माहितीच्या आधारे पोलिसांनी मौजे कोटाळी परिसरात शोधमोहीम राबवून ५ संशयित आरोपींना ताब्यात घेतले. चौकशीत सुरुवातीला आरोपींनी उडवाउडवीची उत्तरे दिली, मात्र सखोल तपासानंतर त्यांनी गुन्ह्याची कबुली दिली.
आरोपींकडून चोरीसाठी वापरलेले २ लाख रुपये किमतीचे अशोक लेलँड कंपनीचे मालवाहू वाहन, तसेच गुन्ह्यात चोरीस गेलेले ७ लाख ६५ हजार रुपये किमतीचे १०२ नग सोलार प्लेट आणि १ लाख १३ हजार १९० रुपये किमतीचे १४७ नग सोलार पॅनल स्टर अँगल असा एकूण १० लाख ७८ हजार १३० रुपयांचा मुद्देमाल जप्त करण्यात आला आहे.
सदर कारवाई पोलीस अधीक्षक अतुल कुलकर्णी, अपर पोलीस अधीक्षक प्रितम यादवकर, उपविभागीय पोलीस अधिकारी संकेत देवळेकर यांच्या मार्गदर्शनाखाली करण्यात आली. या कारवाईत पोलीस निरीक्षक राहुल देशपांडे यांच्या नेतृत्वाखाली पोलीस उपनिरीक्षक व सोलापूर तालुका पोलीस ठाण्यातील अधिकारी व अंमलदारांनी सहभाग घेतला.
