नवी दिल्ली : निवडणूक रणनितीकार प्रशांत किशोर यांनी सध्या देशातील विरोधी पक्षांच्या दिग्गज नेत्यांशी बैठकांचा सपाटा लावला आहे. नुकतीच त्यांनी काँग्रेस नेते राहुल गांधी आणि प्रियांका गांधी यांची भेट घेतली, तर त्या आधी त्यांनी राष्ट्रवादी काँग्रेसचे अध्यक्ष शरद पवार यांचीही भेट घेतली होती. शरद पवार यांना येत्या राष्ट्रपती निवडणुकीत विरोधी पक्षांचा चेहरा करण्यासाठी ही मोर्चेबांधणी चालू असल्याची राजकीय वर्तुळात जोरदार चर्चा आहे.
पश्चिम बंगाल विधानसभा निवडणुकीपासून प्रशांत किशोर यांनी शरद पवारांची तीन वेळा भेट घेतली आहे. यापैकी एका बैठकीला पवारांच्या दिल्लीतील निवासस्थानी विरोधी पक्षाच्या नेत्यांचीही हजेरी होती. प्रशांत किशोर यांच्याकडून विरोधकांची मोर्चेबांधणी केली जात आहे, जेणेकरुन आगामी विधानसभा आणि २०२४ च्या लोकसभा निवडणुकीत भाजपला टक्कर देता येईल. दरम्यान, भाजपला तिसरी किंवा चौथी आघाडी टक्कर देऊ शकते. दरम्यान, राहुल आणि प्रियांका गांधी यांच्यासोबतच्या बैठकीनंतर प्रशांत किशोर हे पंतप्रधान नरेंद्र मोदी यांचं सरकार आणि विरोधक यांच्यातील राजकीय लढाईला नवं वळण देण्याच्या तयारीत असल्याचं सूत्र सांगतात. भाजप सरकारभोवती याचा पहिला फास पुढच्या वर्षी होणाऱ्या राष्ट्रपती निवडणुकीत आवळला जाऊ शकतो, असेही सूत्र सांगतात.
