सोलापूर: उद्योग आणि उद्योजकता विकासाला प्रोत्साहन देण्यासाठी ‘अमृतवेल फाऊंडेशन’च्या माध्यमातून विविध उपक्रमांचे आयोजन करण्यात येते. याचाच एक भाग असलेल्या आणि उद्योजकतेचा मंत्र देणाऱ्या ‘अमृतवेल बिझनेस टॉक शो’ या राज्यव्यापी अभियानाचा शुभारंभ शनिवार दिनांक १४ जून रोजी सोलापुरात होत आहे. उद्योगमंत्री उदय सामंत, प्रेरणादायी वक्ते सुरेश हावरे आणि ललित गांधी यांची यामध्ये प्रकट मुलाखत होणार आहे.
महाराष्ट्र है उद्यमशील राज्य आहे. शासनाच्या माध्यमातूनही उद्योगातील गुंतवणूक आणि उद्योजकतेला नेहमीच प्रोत्साहन दिले जाते. उद्योग विभाग यासाठी प्रभावीपणे कार्यरत आहे. उद्योग क्षेत्रात संधीची अनेक दारे खुली आहेत, त्याकडे सकारात्मकपणे पाहणे आवश्यक आहे. राज्य शासनाचे उद्योग धोरण, उद्योगांना प्रोत्साहन आणि उद्योजकता विकास या अनुशंगाने उद्योगमंत्री उदय सामंत याच्याशी अमृतवेल बिझनेस टॉक शोमध्ये संवाद साधण्यात येणार आहे. हुतात्मा स्मृती मंदिर, सोलापूर येथे दुपारी २.३० वाजता हा कार्यक्रम होणार आहे. अमृतवेल फाऊंडेशन, महाराष्ट्र औद्योगिक विकास महामंडळ (एमआयडीसी) आणि प्रमोद साठे ग्रुप यांच्या वतिने आयोजन करण्यात आले आहे.
न्यूक्लिअर सायंटिस्ट, बिझनेस लीडर आणि प्रेरणादायी यक्ते सुरेश हावरे ‘उद्योगावर बोलू काही’ या विषयावर मार्गदर्शन करणार आहेत. उद्योगांच्या विकासातील भूमिका याविषयी महाराष्ट्र चेंबर्स ऑफ कॉमर्सचे अध्यक्ष ललीत गांधी यांची मुलाखत घेण्यात येणार आहे.
उद्योजक, व्यावसायिक तसेच नवउद्योजक आणि उद्योगामध्ये येऊ इच्छिणाऱ्या तरूणांनी मोठ्या संख्येने या उपक्रमात सहभागी व्हावे, उपस्थित रहावे आणि या उपक्रमाचा लाभ घ्यावा, असे आवाहन अमृतवेल फाऊंडेशनचे संस्थापक अध्यक्ष धर्मेंद्र पवार, कार्यक्रमाचे निमंत्रक मुकुंद हिंगणे आणि सिद्धाराम वाघ यांनी केले आहे.
