जयंत पडसलगीकर लिखित पुस्तकाचे थाटात प्रकाशन
सोलापूर, (प्रतिनिधी):- आजच्या कोरोनाच्या महामारीमध्ये आरोग्याची काळजी महत्वाची आहे आणि त्याच पार्श्वभूमीवर सर्वच रोगापासून शरीर सृदृढ ठेवण्यासाठी ड्रगलेस थेरपी दोन च्या अंतर्गत प्रभावी मुद्रा हे पुस्तक मार्गदर्शक आहे असे प्रतिपादन माजी मंत्री आ. सुभाष देशमुख यांनी केले. स्वरूपा योग अ्नयुप्रेशर केंद्राचे मुद्रा तज्ञ जयंत पडसलगीकर यांच्या प्रभावी मुद्रा या पुस्तकाचे प्रकाशन बुधवार दि. 16 डिसेंबर रोजी मानस लॉन येथे करण्यात आले त्यावेळी ते बोलत होते. यावेळी योग शिक्षिका सुधा अळ्ळीमोरे, प्रशांत बडवे उपस्थित होते.
जगभर थैमान घालत असलेल्या कोरोना या महामारीमुळे अनेकांना आपले जीव गमवावे लागले तर अनेकजण बाधित झाले. त्यामुळे यापुढील काळात रोगमुक्त आरोग्यासाठीच लोकांना प्रयत्न करावे लागतील. आपल्या दिनचर्येमध्ये व्यायाम, योगा करणे गरजेचे झाले आहे. जगातील प्रत्येकाला कोणत्या ना कोणत्या आजाराने ग्रासले आहे. परंतु त्यावर उपायही उपलब्ध आहेत. त्यातच जयंत पडसलगीकर गुरूजींनी सांगितलेली मुद्रा थेरपी आपल्या आरोग्याला सृदृढ करणारी आहे. अत्यंत सोप्या भाषेत मुद्रा सांगणारे जयंत पडसलगीकर गुरूजी यांनी पुस्तकाच्या माध्यमातून मुद्रा चे प्रकार सांगितले आहे ते प्रत्येकाने आपल्या जीवनात अंगिकारावे असेही आ. सुभाष देशमुख यांनी सांगितले.
योगाच्या माध्यमातून निरोगी शरीर करता येते त्याच बरोबर योगासोबत मुद्राही आवश्यक आहे योगा आणि मुद्रा यातून शरीर आणि मनाचे स्वास्थ चांगले राहते असे योग शिक्षिका सुधा अळ्ळीमोरे यांनी आपल्या मनोगतामध्ये सांगितले.
प्रभावी मुद्रा या पुस्तकाबद्दल बोलताना जयंत पडसलगीकर यांनी विविध रोगावर मुद्रा कशी प्रभावी आहे याबाबत सविस्तर सांगितले. काही मुद्रा प्रकारही त्यांनी उपस्थितांसमोर करून दाखवले.
प्रारंभी राजेश पडसलगीकर यांनी प्रास्ताविक करून सर्वांचे स्वागत केले त्यानंतर मान्यवरांचा सत्कार करण्यात आला आणि नंतर मान्यवरांच्या हस्ते लेखक जयंत पडसलगीकर यांचा सत्कार झाला. त्यानंतर या पुस्तकाचे प्रकाशक संतोष क्षिरसागर, अरविंद कोंकात्ती यांचाही सत्कार प्रमुख पाहुण्यांच्या हस्ते करण्यात आला. या कार्यक्रमाचे सूत्रसंचालन पुरूषोत्तम बागडी यांनी केले तर आभार श्रध्दा पडसलगीकर यांनी मानले. या कार्यक्रमाला शैलेश बचुवार, अनिल कोठारी, संजय सेठीया, विनोद सेठीया, अमोल काबरा, हितेश कांकरीया, दादा शिरसिकर, उपेंद्र शिरसीकर आदींसह मोठी उपस्थिती होती.
