येस न्यूज नेटवर्क :
महाराष्ट्रातील ‘एमबीबीएस’ (MBBS) आणि ‘बीडीएस’ (BDS) पदवी अभ्यासक्रमांच्या राज्य कोट्यांतर्गत सुरू असलेल्या केंद्रीय प्रवेश प्रक्रियेच्या दुसऱ्या फेरीअखेर ८२.७५ टक्के जागांवर प्रवेश निश्चित झाले आहेत. दुसऱ्या फेरीत उपलब्ध असलेल्या एकूण ११,९१६ जागांपैकी ९,२६५ जागांवर विद्यार्थ्यांनी प्रवेश घेतले असून, अद्याप १,९३१ जागा रिक्त राहिल्या आहेत. या रिक्त जागा आता तिसऱ्या फेरीसाठी (CAP Round 3) उपलब्ध करून दिल्या जाणार असल्याची माहिती राज्य सामाईक प्रवेश परीक्षा कक्षाने (सीईटी सेल) दिली आहे.
एमबीबीएस अभ्यासक्रमाच्या राज्यातील ६७ वैद्यकीय महाविद्यालयांमध्ये उपलब्ध असलेल्या ८,५७९ जागांपैकी ७,९३० जागांवर प्रवेश पूर्ण झाले असून ९४९ जागा रिक्त आहेत. यात ४२ शासकीय महाविद्यालयातील ४,९८० जागांपैकी ४,८२५ जागांवर प्रवेश झाले असून १५५ रिक्त राहिल्या आहेत. तर २३ खासगी महाविद्यालयातील ३,४४९ जागांपैकी २,९ ९२५जागांवर प्रवेश होऊन ५२४ जागा रिक्त आहेत.खाजगी विद्यापीठातील ४५० जागांपैकी १८० जागांवर प्रवेश होऊन तब्बल २७० रिक्त राहिल्या आहेत. राज्यातील २९ दंत महाविद्यालयांमधील २,६२० जागांपैकी १,६३५ जागांवर प्रवेश झाले असून तब्बल ९८२ जागा रिक्त आहेत. यात ४ शासकीय महाविद्यालयातील ३२० जागांपैकी २५४ प्रवेश पूर्ण ६६ रिक्त 230 खासगी महाविद्यायातील २,२०० जागांपैकी १,३४५ प्रवेश पूर्ण जागा ८५५ जागा अजूनही रिक्त राहिल्या आहेत.
रिक्त जागांवर प्रवेशासाठी तिसऱ्या फेरीचे (Round 3) वेळापत्रक जाहीर झाले असून २८ सप्टेंबर रोजी तात्पुरती सर्वसाधारण गुणवत्ता यादी प्रसिद्ध होईल. तसेच रात्री ११ वाजेपर्यंत पोर्टलवर मूळ कागदपत्रांच्या रंगीत स्कॅन प्रती अपलोड करणे अनिवार्य राहील. ६ ऑक्टोबर रोजी तिसऱ्या फेरीसाठी रिक्त जागांचे वर्गीकरण (Seat Matrix) जाहीर होईल.
७ ते ९ ऑक्टोबर दरम्यान विद्यार्थ्यांना ऑनलाइन प्राधान्यक्रम (Choice/Option Form) भरता येईल.
११ ऑक्टोबर रोजी तिसऱ्या फेरीची निवड यादी (Selection List) प्रसिद्ध करण्यात येईल.
