कोण कसाही असला तरीही विरोधकांमध्ये तुल्यबळ उमेदवार राहूच नये, यासाठी राज्यभर चालविलेले भाजपचे ऑपरेशन लोटस सोलापूर जिल्ह्यात देखील जोमाने सुरू आहे. आमदार विजयकुमार देशमुख तसेच आमदार सुभाष देशमुख यांनी कितीही विरोध केला तरीही आमदार देवेंद्र कोठे यांच्या माध्यमातून पालकमंत्री जयकुमार गोरे यांच्या नेतृत्वाखाली सोलापूर शहरात ऑपरेशन लोटस जोमाने सुरू आहे. गोल्डन नगरसेविका म्हणून सोलापूर शहरात प्रसिद्ध असलेल्या श्रीदेवी फुलारे यांनाही आता भाजपने मुख्यमंत्री देवेंद्र फडणवीस यांच्या उपस्थितीत आपल्याकडे घेतले आहे. आता आणखी चार माजी नगरसेवक भाजपाच्या वाटेवर आहेत.
काँग्रेस आणि राष्ट्रवादी तसेच शिवसेनेचे आजवर एकूण 15 नगरसेवक भाजपने आपल्या कडे खेचून घेतले आहेत. आमदार सुभाष देशमुख यांनी विरोध केल्यामुळे माजी आमदार दिलीप माने यांचा भाजप प्रवेश थांबला आहे. मात्र त्यांचा येत्या आठ ते दहा दिवसात भाजप प्रवेश नक्की होणार अशी माहिती भाजपमधील विश्वसनीय सूत्राकडून दिली जात आहे. ऑपरेशन लोटसच्या माध्यमातून आमदार देवेंद्र कोठे यांनी अनेक नगरसेवकांना भाजपकडे ओढण्यासाठी यशस्वी प्रयत्न केल्यामुळे आमदार सुभाष देशमुख आणि आमदार विजयकुमार देशमुख यांच्यापेक्षा देखील विकास कामासाठी निधी कोठेंनाच दिला जात आहे ही वस्तुस्थिती आहे
