सोलापूर महापालिकेच्या निवडणुकीत भाजपमध्ये झालेली ‘होलसेल आवक’.. त्यातच आमदार देवेंद्र कोठे तसेच माजी आमदार दिलीप माने यांना महापालिकेच्या तिकीट वाटपात शहर उत्तर आणि दक्षिण मतदार संघात मिळणारा सिंहाचा वाटा.. आणि त्यामुळे आपल्याला… होणारा घाटा या पार्श्वभूमीवर आमदार विजयकुमार देशमुख आणि आमदार सुभाष देशमुख यांनी भाजप विरुद्ध आणि विशेषता पालकमंत्री जयकुमार गोरे यांच्याविरुद्ध उघडपणे बंड पुकारले आहे. त्यामुळे जागा वाटपाचे त्रांगडे कायम असून बंडखोरी टाळण्यासाठी उमेदवारी अर्ज भरण्याच्या शेवटच्या दिवशी म्हणजे मंगळवारी भाजप उमेदवारांची यादी जाहीर करणार आहे. आमदार देवेंद्र कोठे यांनी शहर उत्तर मतदार संघातील आमदार विजयकुमार देशमुख यांच्या मतदार संघातील एकूण असणाऱ्या 44 जागांपैकी प्रभाग क्रमांक पाच, सात, 10 आणि 11 या एकूण 16 जागांवर दावा केला आहे. त्यामुळे साहजिकच आमदार विजयकुमार देशमुख भडकले आहेत.
गेल्याच आठवड्यात भाजपमध्ये प्रवेश दिलेल्या माजी आमदार दिलीप माने यांच्या कार्यकर्त्यांसाठी त्यांनी प्रभाग 22, 23, 25 आणि 26 मधील एकूण 10 जागा मागितल्या आहेत. त्यामुळे इथे आमदार सुभाष देशमुख यांचा इगो दुखावला आहे. लोकसभा निवडणुकीत सोलापूर आणि माढा या दोन्ही मतदारसंघात झालेल्या दारुण पराभवापासून भाजपने दोनही आमदारांना दूर ठेवले. एवढेच नव्हे तर वारंवार त्यांच्या जखमेवर मीठ चोळणारे निर्णय घेतले. त्यातच आता महापालिका निवडणुकीत देखील त्यांना डावलून तिकिटे वाटप सुरू असल्यामुळे दोनही आमदार देशमुखांच्या अस्तित्वाचा प्रश्न निर्माण झाला आहे. त्यामुळे आता सुभाष देशमुख आणि विजयकुमार देशमुख यांनी एकत्र येऊन निष्ठावान कार्यकर्ते कोणत्याही पक्षात गेले तरीही त्यांना निवडून आणण्यासाठी आघाडी करतील आणि त्यांचाच प्रचार करतील असे सध्या दिसत आहे. भाजपचे हे त्रांगडे झाल्यामुळे फुल फार्मात असलेला भाजप सध्या पिछाडीवर असून महाविकास आघाडीवर असून सोमवार आणि मंगळवारी राजकीय मोठे बॉम्ब फुटणार हे नक्की.
