दक्षिण सोलापूर, दि. 13- इंगळगी ग्रामपंचायतीच्या सरपंचपदी भाजपचे युवा नेते विनोद बनसोडे यांची निवड झाली असून आमदार सुभाष देशमुख यांच्या गटाची सत्ता कायम राहिली आहे.
इंगळगी ग्रामपंचायतीच्या सरपंच निवडणुकीची प्रक्रिया मंगळवारी अध्यासी अधिकारी आर. ए. भाईजान यांच्या अध्यक्षतेखाली पार पडली. यावेळी सरपंच म्हणून विनोद बनसोडे यांची निवड झाली. निवडीनंतर नूतन सरपंच विनोद बनसोडे यांचा आमदार सुभाष देशमुख यांनी सत्कार केला. यावेळी युवा उद्योजक शिवानंद हत्तुरे, कृषी अभ्यासक इंद्रजीत माने, पत्रकार राहुल वंजारे, भाजप बूथ प्रमुख सागर धुळवे, रफिक शेख, राजशेखर बंडगर, प्रधान गुरव, जगदीश दसाडे, रेवन सनके, आमसिद्ध कोरे, मारुती रणखांबे, सतीश कदम आदी कार्यकर्ते मोठ्या संख्येने उपस्थित होते.
यावेळी आमदार सुभाष देशमुख यांनी नूतन सरपंच बनसोडे व सर्व सदस्यांना शुभेच्छा देऊन गावच्या सर्वांगीण विकासासाठी काम करा, असे सांगितले. सर्वांना सोबत घेऊन गावच्या प्रगतीसाठी व सध्या पाणीटंचाई दूर करण्यासाठी आपण प्रामुख्याने काम करणार असल्याचे नूतन सरपंच बनसोडे यांनी यावेळी सांगितले.
