सोलापूर झेडपीच्या प्राथमिक शिक्षण खात्यामध्ये केंद्रप्रमुख पदावर शिक्षकांना पदोन्नती देण्यासंदर्भात मनमानी सुरू आहे. शासनाच्या धोरणानुसार पदवीधर शिक्षकांना सेवा जेष्ठतेनुसार समुपदेशन घेऊन केंद्रप्रमुख पदावर पदोन्नती दिली जाते त्यासाठी त्यांना पदवीधर शिक्षक म्हणून सहा वर्ष सेवा करणे गरजेचे आहे. 2023 साली 18 शिक्षकांनी वरील प्रमाणे शासन आदेशाची पात्रता पूर्ण केले नसल्यामुळे त्यांची पदोन्नती नाकारण्यात आली होती. अजूनही त्यांच्या पदवीधर शिक्षक पदास सहा वर्षांचा कालावधी पूर्ण झाला नाही असे असताना एप्रिल महिन्यात दहा शिक्षकांना नियमबाह्य पद्धतीने अत्यंत गोपनीय पद्धतीने केंद्रप्रमुख पदावर प्रमोशन देण्यात आले आहे. उर्वरित आठ शिक्षकांना देखील आता नियमबाह्य पद्धतीने पदोन्नती देण्याची प्रक्रिया सुरू असून याची फाईल शिक्षणाधिकारी तसेच सामान्य प्रशासन विभागामार्फत झेडपीचे मुख्य कार्यकारी अधिकारी कुशल जैन यांच्याकडे पाठवण्यात आली आहे. 2023 रोजी विभागीय पदोन्नती समितीने अपात्र ठरविलेल्या या 18 शिक्षकांना कोर्टाचा चुकीचा आदेश लावून वर कमाई करून नियमबाह्य पद्धतीने केंद्रप्रमुखाच्या ऑर्डर दिली असल्याची तक्रार शिक्षकांनी केली आहे. त्यामुळेच या 18 शिक्षकांच्या नियुक्ती बाबत पारदर्शकता न दाखवता गोपनीय पद्धतीने हे कामकाज सुरू आहे. झेडपीचे सीईओ कुशल जैन यांनी या प्रकरणाचा छडा लावणे गरजेचे आहे.
सोलापूर झेडपीचा अजब कारभार, 2023 ला अपात्र शिक्षकांना आता दिली केंद्रप्रमुखाची पदोन्नती
