सोलापूर : बचत गटांना केलेला कर्जपुरवठा सहसा थकबाकीत जात नाही. त्यातून स्त्रिया एका बाजूने स्वावलंबी तर होतातच पण त्यांचा आत्मविश्वास वाढून सामाजिक समृद्धीही साधली जाते व बँकेची ही प्रगती होते. त्यामुळे बँक ऑफ महाराष्ट्र बचतगट चळवळीच्यामागे खंबीरपणे उभी राहील असे प्रतिपादन बँक ऑफ महाराष्ट्रचे कार्यकारी संचालक ए.बी. विजयकुमार यांनी काढले.
ते पुढे म्हणाले की- पंतप्रधान नरेंद्र मोदी यांनी हे वर्ष आजादी के 75 साल म्हणून साजरे करण्यात येणार आहे, त्याला प्रतिसाद देत बँकेच्या कळमण शाखेने सुमारे त्रेपन्न बचत गटांना एक कोटी रुपयांचे व इतर 22 रिटेल व कृषी कर्ज प्रकरणात अशा एकूण 75 खातेदारांना एक कोटी 40 लाखांचे कर्ज मंजुरी पत्रे वितरित करताना ते बोलत होते. बँक ऑफ महाराष्ट्राच्या कळमण शाखेच्या वतीने आयोजित महिला बचत गटाच्या मेळाव्याचे प्रमुख पाहुणे म्हणून ते बोलत होते. कार्यक्रमाचे प्रास्ताविक करताना बँकेच्या सोलापूर झोनच्या झोनल मॅनेजर श्रीमती सुनिता भोसले यांनी सोलापूर झोनचा व कळमण शाखेच्या वाटचालीचा आढावा घेतला. विजय कुमार यांचा परिचय झोनचे उपविभागीय व्यवस्थापक हेमंत महाजन यांनी करून दिला. त्यानंतर विजयकुमार यांचे स्वागत उपसरपंच सुनील पाटील यांनी, सुनिता भोसले यांचे स्वागत विनोदा भोरे यांनी तर श्री. हेमंत महाजन यांचे स्वागत सरपंच पांडुरंग लंबे तर शाखा व्यवस्थापक अभिषेक कुमार यांचे स्वागत सरपंच पांडुरंग तांबे यांनी फेटा बांधून व बुके देऊन केले. तर ग्रामपंचायत पदाधिकाऱ्यांचे स्वागत बँकेचे शाखा व्यवस्थापक अभिषेक कुमार व रोखपाल रोहिदास मंडलिक यांनी केले.
ग्रामपंचायतीच्या सभागृहात आयोजित महिलांची खचाखच उपस्थिती असताना विजय कुमार यांनी खुर्चीवर बसणे नाकारून सामान्यजना प्रमाणे जमिनीवर बसून कार्यक्रम पार पाडल्याने आपल्या साधेपणाची छाप उपस्थितांवर पाडली होती. बचत गटातर्फे अनिता शिंदे व ज्योत्स्ना नाईक यांनी तर एम एस आर एल एम च्या समन्वयक मीनाक्षी मडियाल यांनी आपले विचार व्यक्त करताना बँकेचे सुखद अनुभव शेअर केले. बचत गटांच्या वतीने सभागृहासमोर आकर्षक अशी रांगोळी काढण्यात आली होती व ग्रामीण भागातील पद्धतीप्रमाणे शहरी मान्यवरांना फेटे बांधण्यात आल्याने वातावरण खूप उत्साही होते. कार्यक्रमाचे सूत्रसंचालन प्रसाद अतनूरकर आणि शिक्षक नागनाथ माळी यांनी केले.तर कार्यक्रमाचे आभार प्रदर्शन कळमण शाखेचे व्यवस्थापक अभिषेक कुमार यांनी केले.