सोलापूर : राज्याच्या भूजल सर्वेक्षण आणि विकास यंत्रणेच्या येत्या १६ जुलै २०२१ रोजीच्या सुवर्ण महोत्सवानिमित्त जिल्ह्यात भूजल या विषयावर जनजागृती मोहिम केली जाणार असल्याची माहिती भूजल सर्वेक्षण आणि विकास यंत्रणेचे संचालक डॉ.मल्लिनाथ कलशेट्टी यांनी दिली.
याबाबत संचालक डॉ.मल्लिनाथ कलशेट्टी म्हणाले , येत्या १६ जुलै रोजी राज्याच्या भूजल सर्वेक्षण आणि विकास यंत्रणेस ५० वर्षे पूर्ण होत आहे.आज सर्वत्र भूजलामधून भरमसाठपणे पाण्याचा उपसा केला जात आहे पण दुर्दैवाने पावसाळ्यात पडणारे पाणी जमिनीत मुरवण्याची मानसिकता ही फारशी दिसत नाही.यासाठी आज समाजात सर्व स्तरावर जलसाक्षरता होणेही अत्यंत महत्त्वाची आहे.म्हणूनच भूजल विकास यंत्रणेच्या सुवर्ण महोत्सवाचे औचित्य साधून जिल्ह्यातील शासकीय अधिकारी , कर्मचारी , विद्यार्थी व ग्रामपंचायतचे पदाधिकारी , सदस्य , ग्रामस्थ यांना भूजलविषयी वेबिनार ,युट्युब या अॉनलाईनच्या माध्यमातून माहिती देऊन जनजागृती केली जाणार आहे.
या अंतर्गतच भूजल सर्वेक्षण विकास यंत्रणा व पुण्यश्लोक अहिल्यादेवी होळकर सोलापूर विद्यापीठ सोलापूर यांच्या संयुक्त विद्यमाने आज गुरूवार १७ जुन २०२१ रोजी सायंकाळी ४ वाजता युट्युबच्या माध्यमातून वेबिनार आयोजित करण्यात आला आहे.या वेबिनारमध्ये दयानंद महाविद्यालयाचे माजी प्राचार्य श्रीनिवास वडगबाळकर हे जिल्ह्यातील भूजल व भूशास्त्र याविषयी मार्गदर्शन करणार आहेत.सदर वेबिनारमध्ये https://youtu.be/ouNXzkTm5p0 या लिंकच्या माध्यमातून सर्वांनी मोठ्या संख्येने सहभागी व्हावे असे आवाहन भूजल सर्वेक्षण विकास यंत्रणेचे वरिष्ठ भूवैज्ञानिक मुश्ताक शेख यांनी केले आहे.