सोलापूर : सकल मराठा समाज सोलापूर शहर व जिल्ह्याच्या वतीने मराठा समाजाला ओबीसीमधून आरक्षण मिळावे आणी सरसकट मराठ्यांना कुणबी दाखले मिळावे, म्हणून १७ दिवस अन्न आणि पाणी त्याग करणारे मनोज जरांगे-पाटील यांची जाहीर सभा, ०५ ऑक्टोबर रोजी सोलापुरातील हुतात्मा स्मृती मंदिर येथे दुपारी २ वाजता आयोजित करण्यात आली असल्याची सकल मराठा समाज संघटनेचे माऊली पवार यांनी पत्रकार परिषदेत दिली. जरांगे-पाटील सोलापूर जिल्ह्यातील सोलापूर शहरासह, मंगळवेढा, बार्शी, कुर्डूवाडी, पंढरपूर या तालुक्याच्या ठिकाणी जाहीर सभा घेणार आहेत.त्यासाठी ते ५ आणि ६ तारखेला सोलापूर दौऱ्यावर येत आहेत.
अंतरवाली-सराटी येथे होणाऱ्या मराठा आरक्षण परिषदेला हजर राहण्याचे आवाहन करण्यासाठी जरांगे पाटील हे सोलापूर जिल्ह्याच्या दौऱ्यावर आहेत. सकल मराठा समाजाच्या वतीने मराठा समाजाला आरक्षण मिळावे, म्हणून संपूर्ण महाराष्ट्रात ५८ मोर्चे काढले. पण सरकारकडून न टिकणारे आरक्षण देऊन समाजाची फसवणूक केली असल्याची खंत प्रारंभी माऊली पवार यांनी व्यक्त केली.
