अक्कलकोट तालुक्यातील मौजे. मुगळी येथे लोखंडी सळईने एकास गंभीर मारहाण व जातीवाचक शिवीगाळ केल्याप्रकरणी आरोपी नागप्‍पा व्हंडारे व चंद्रकांत व्हंडारे यास मा.जिल्हा व सत्र न्यायाधीश श्री. जयदीप मोहिते यांनी सशर्त अटकपूर्व जामीन मंजूर केला आहे.
वरील प्रकरणात फिर्यादी प्रकाश जमादार यांनी अक्कलकोट दक्षिण पोलीस स्टेशन अंतर्गत गुन्हे क्रमांक -७५४/२५ अन्वये वरील दोन आरोपीं विरुद्ध गुन्हा दाखल केला होता. फिर्यादी हे त्यांच्या ओळखीचे मित्र शरणप्पा बिराजदार यांच्या वस्तीवर जनावरांना चारापाणी करण्यासाठी जात असताना यातील आरोपी यांना हाक मारल्याच्या कारणावरून तसेच इशारा केल्या कारणाने वरील दोन्ही आरोपी यांनी फिर्यादीस जाब विचारले असता तू नेहमीच आम्हाला बघून आवाज करतो व इशारा करतो असे म्हणून यातील आरोपींनी फिर्यादीला लाथा बुक्क्यांनी तसेच लोखंडी सळीने त्याच्यावर गंभीर स्वरूपाची मारहाण केली होती.त्यामुळे फिर्यादीच्या डाव्या हाताच्या मनगटावर उजव्या हाताच्या दंडावर गंभीर दुखापत झाली होती. यातील आरोपी यांनी फिर्यादीस दमदाटी करत जातीवाचक शिवीगाळ केल्या असल्याचाही आरोप फिर्यादी यांनी केला होता. घटनेनंतर सोडवा- सोडवी करण्यासाठी गावातील शरणाप्पा गायकवाड यांनी प्रयत्न केले होते, त्यानंतर दोन्ही आरोपी मोटरसायकलवर सदर ठिकाणाहून फरार झाले होते. तदनंतर आरोपींनी आपला अटकपूर्व जामीन अर्ज मे.जिल्हा व सत्र न्यायालय सोलापूर येथे दाखल केला होता. दि-०३/०२/२०२६ रोजी आरोपींचा अटकपूर्व जामीन अर्ज विशेष न्यायालयाने सशर्त मंजूर केला आहे. सदर प्रकरणात आरोपीतर्फे ॲड.कदीर औटी,ॲड. दत्तात्रेय कापुरे,ॲड. वैभव बोंगे,ॲड. शिवरत्न वाघ, ॲड. ओंकार फडतरे, ॲड. मनीष बाबरे, ॲड. मोहीम पठाण, ॲड. रोहित थोरात, ॲड. अजय वाघमारे, ॲड. त्वरिता वाघ यांनी काम पाहिले तर फिर्यादी तर्फे ॲड.संघर्षित उड्डांशू व सरकारतर्फे ॲड. दत्ता पवार यांनी काम पाहिले.
