येस न्युज मराठी नेटवर्क : जम्मू-काश्मीरचा विशेष दर्जा रद्द करण्यात आल्यानंतर यंदा प्रथमच झालेल्या जिल्हा विकास परिषदांच्या (डीडीसी) निवडणुकीत फारुख अब्दुल्ला यांच्या नेतृत्वातील गुपकर आघाडीला मोठं यश मिळालं आहे. एकूण २० जिल्ह्यांमध्ये होत असलेल्या या निवडणुकीत गुपकर आघाडीने १३ जिल्यांमध्ये विजय मिळवला आहे. गुपकर आघाडीत सात पक्ष असून काँग्रेसचाही समावेश आहे. दुसरीकडे भाजपाने सहा जिल्ह्यांमध्ये विजय मिळवला आहे.
गुपकर आघाडीत मुख्यत्वे जम्मू काश्मीरमधील स्थानिक पक्षांचा समावेश आहे. यामध्ये राजकीय प्रतिस्पर्धी असणारे नॅशनल कॉन्फरन्स आणि मेहबुबा मुफ्ती यांच्या पीपल्स डेमोक्रॅटिक पक्षाचाही समावेश आहे. गुपकर आघाडीने १०० हून अधिक जागांवर विजय मिळवला आहे. तर दुसरीकडे भाजपा ७४ जागांसहित सर्वात मोठा पक्ष ठरला आहे. काँग्रेसने २६ जागांवर विजय मिळवला आहे.
२० जिल्ह्यात प्रत्येकी १४ जागांवर अशा पद्दतीने एकूण २८० जागांसाठी ही निवडणूक पार पडली असून निकाल घोषित करण्यात आले आहेत. अपेक्षेप्रमाणे आघाडीने काश्मीमध्ये विजय मिळवला असून भाजपाने जम्मूमध्ये सर्वाधिक जागा मिळवल्या आहेत.
काश्मीरमध्ये गुपकर आघाडीने ७२ जागांवर विजयी मोहोर उमटवली असून भाजपाला फक्त तीन जागा मिळाल्या आहेत. आघाडीने नऊ जिल्ह्यांमध्ये सत्ता स्थापन करण्याचा निर्णय घेतला आहे. दुसरीकडे श्रीनगर जिल्ह्यात अपक्ष उमेदवारांनी आघाडी घेतल्याने तेथील चित्र स्पष्ट नाही.
जम्मूबद्दल बोलायचं गेल्यास भाजपाने ७१ जागा मिळवल्या आहेत. उधमूपर, सांबा, कठुआ अशा ठिकाणी भाजपा विजयी झाली आहे. नॅशनल कॉन्फरन्स आणि काँग्रेसने ४५ जागा जिंकल्या आहेत. नॅशनल कॉन्फरन्स आणि पीडीपीने आफल्या अनेक नेत्यांना निकालाआधी ताब्यात घेतल्याचा आरोप केला आहे.
दहशतवाद्यांशी लागेबांधे असल्याच्या आरोपावरून सध्या राष्ट्रीय तपास यंत्रणेच्या (एनआयए) कोठडीत असलेला पीडीपीचा युवक अध्यक्ष वाहीद पारा हा मंगळवारी जिल्हा विकास परिषदेच्या (डीडीसी) निवडणुकीत पुलवामा जिल्ह्य़ातून विजयी झाला. पारा याने भाजपचे उमेदवार साजद अहमद रैना यांचा पराभव केला.
भाजपाने पहिल्यांदाच काश्मीरमध्ये मिळालेल्या विजयावर प्रतिक्रिया देताना ही बदलाची लाट असल्याची प्रतिक्रिया दिली आहे. भाजपाच्या तीन उमेदवारांनी नॅशनल कॉन्फरन्स आणि पीडीपीचा पराभव केला आहे.
“जम्मू काश्मीरमधील लोकांचा पंतप्रधान नरेंद्र मोदींच्या विकासाच्या व्हिजनवर विश्वास असल्याचं सिद्ध होत आहे,” असं केंद्रीय मंत्री जितेंद्र सिंह यांनी म्हटलं आहे. दुसरीकडे ओमर अब्दुल्ला आणि मेहबुबा मुफ्ती यांनी मात्र या निकालांवरुन जम्मू काश्मीरमधील जनतेने ३६० कलम हटवण्याच्या निर्णयाला धुडकावून लावल्याचं सिद्ध होत असल्याचं सांगितलं आहे.
