आपल्या लाडक्या गणरायाला निरोप देण्याची वेळ समिप आली आहे. आज अनंत चतुर्दशी, बाप्पाच्या विसर्जनाचा दिवस .दहा दिवस लाडक्या बाप्पाची अत्यंत धामधुमीत आणि मनोभावे पूजा आराधना करून जड अंतकरणाने “गणपती बाप्पा मोरया पुढच्या वर्षी लवकर या” च्या जयघोषात बाप्पाला निरोप दिला जाणार. ही विसर्जन मिरवणूक वैभवशाली आणि दिमाखदार करण्यासाठी अनेक ठिकाणची मंडळे आणि कार्यकर्ते सज्ज झाले आहेत. याबरोबरच पोलिसांचा बंदोबस्त ही तैनात करण्यात आला आहे.
पुण्यात भाविकांची सुरक्षितता, गर्दीचे अचूक व्यवस्थापन आणि शिस्त राखण्यासाठी अत्याधुनिक तंत्रज्ञानाचा वापर करत हायटेक सुरक्षा कवच उभारले आहे. पुणे पोलीस मुख्यालयातील ‘ इंटिग्रेटेड कमांड अँड कंट्रोल सेंटर’ आणि स्वतंत्र वॉर रूम मधून शहरावर 24 तास रियल टाईम लक्ष ठेवले जाणार आहे. तसेच संवेदनशील भागांवर पाळत ठेवण्यासाठी मायक्रो व स्मॉल ड्रोन, पाच मोबाईल सर्विलन्स व्हेहिकल्स आणि 19 मिनि सर्विलन्स व्हेईकल तैनात आहेत.मुंबई ,पुण्यासह अनेक शहरातील विसर्जन मिरवणूकांना सकाळपासून सुरुवात झाली.
पुण्यातील मानाचा पहिला गणपती तसेच पुण्यनगरीचे ग्रामदैवत म्हणून ओळख असलेल्या कसबा गणपती च्या विसर्जन मिरवणुकीला सुरुवात झालीये. एकूणच या सृजन सोहळ्याची लवकर थाटामाटात सांगता होणार….
